უზენაესი სასამართლოს თავმჯდომარემ და იუსტიციის უმაღლესი საბჭოს თავმჯდომარემ ნინო გვენეტაძემ იუსტიციის უმაღლესი საბჭოს სხდომა დროზე ადრე დაასრულა. მისი თქმით, მას არ შეუძლია მსგავს რეჟიმში მუშაობა.

საბჭოს დღევანდელ სხდომაზე ცნობილი გახდა, რომ გვენეტაძეს მოსამართლეების უვადოდ დანიშვნის ბრძანებაზე ხელი ამ დრომდე არ მოუწერია. საბჭოს წევრები მისგან დაუყოვნებლივ ახსნა-განმარტებას მოითხოვდნენ. გვენეტაძემ განაცხადა, რომ ამასთან დაკავშირებით განმარტებას მას შემდეგ გააკეთებდა, რაც დღის წესრიგით გათვალისწინებულ საკითხებს გაივლიდნენ.

"თქვენ გინდათ პასუხად და მთელი სხდომა მაძალებდით და იძულებას ახორციელებდით ჩემზე, რომ ან კი გვითხარი, ან არა. ასეთი კი და არა ამ კითხვებზე არ არსებობს. მე არაფერს არ ვერიდები, მე პასუხისმგებლობას ვიღებ ყველაფერზე. ახლა ამ ფორმატში მუშაობა არის აბსოლუტურად შეუძლებელი, მეც და თქვენც - ეს არ არის შეურაცხყოფა - არაადეკვატურები ვართ. ამ დღეს რომელსაც ჰქვია იძულების, შანტაჟის, მე ყველა პასუხს ჩავწერ და ყველა პასუხს წერილობით მოგართმევთ", - განაცხადა საბჭოს თავმჯდომარემ სხდომის დასრულებამდე.

მისივე თქმით, საბჭოს წევრებს თავის პოზიციას წერილობით გააცნობს. იუსტიციის უმაღლესი საბჭოს არამოსამართლე წევრმა ვახტანგ მჭედლიშვილმა ჟურნალისტებთან განაცხადა, რომ მოსამართლე წევრები ეწევიან საბოტაჟს "საკუთარი ქვეყნის წინაშე":

"ამ საბოტაჟის შედეგი არის ის, რომ დღეს მართლმსაჯულება ხელმისაწვდომი აღარ არის მოქალაქეებისთვის. ეს არის შედეგი იმ ქცევების, რაც ამ ხნის განმავლობაში მიმდინარეობს. ეს ქვეყანა არ არის მარტო მოსამართლე წევრების და ნამდვილად ვერ მივცემთ საბოტაჟის უფლებას. ეს არ არის კერძო კომპანია".

20 ოქტომბერს იუსტიციის უმაღლესმა საბჭომ 34 მოსამართლე უვადოდ გაამწესა. კენჭისყრაში უმაღლესი საბჭოს თავმჯდომარეს, უზენაესი სასამართლოს თავმჯდომარეს მონაწილეობა არ მიუღია