სერბი სტუდენტების ჯგუფი რამდენიმე დღის წინ სტრასბურგისკენ ველოსიპედებით გაემართა. 1400 კილომეტრის გავლა სტუდენტებმა ევროპარლამენტის შეხვედრაზე დასასწრებად გადაწყვიტა — მათი მიზანია, ევროკავშირის ქვეყნებს მიმართონ და ქვეყანაში მიმდინარე რამდენიმეთვიანი საპროტესტო აქციების შესახებ ისაუბრონ.

სერბეთის პრეზიდენტის, ალექსანდრ ვუჩიჩის მთავრობა საერთაშორისო და ადგილობრივი კრიტიკის ქარცეცხლში მას შემდეგ გაეხვა, რაც ქალაქ ნოვი-სადში მთავრობის მიერ პომპეზურად გახსნილი, განახლებული რკინიგზის სადგურის ჩამონგრევამ 16 ადამიანის სიცოცხლე შეიწირა. სადგურის ჩამონგრევა სერბეთის მოსახლეობამ მთავრობის კორუფციას მიაწერა — მათი თქმით, ისინი მმართველ პარტიას არ ენდობიან.

ფოტო: Mašina

"ჩვენი მოტივი მარტივია. ჩვენი საზოგადოება 16 ადამიანის სიკვდილის შემდეგ ჩუმად რომ დარჩენილიყო, ბარბაროსები ვიქნებოდით. გვსურს, ევროპელებს მივმართოთ და სერბეთში მიმდინარე მოვლენები ავუხსნათ," — ამბობს სერბი სტუდენტი, ველკო.

დემონსტრანტებს სურთ, რომ ევროპის სახელმწიფოების მთავრობებმა უფრო ცხადად დაგმონ ალექსანდრ ვუჩიჩის რეჟიმი. სტრასბურგში ჩასვლის შემდეგ, ისინი ადამიანთა უფლებების ევროპულ სასამართლოში წერილს შეიტანენ, სადაც აღწერილი იქნება ქვეყანაში განვითარებული მოვლენები 2024 წლის ნოემბრის შემდეგ და რომელიც მთავრობის კრახს აღწერს.

სერბმა სტუდენტებმა ორი დღის წინ გადაკვეთეს უნგრეთის საზღვარი გადაკვეთეს, სადაც მოსახლეობა მათ გულთბილად, აპლოდისმენტებით დახვდა და უმასპინძლა.

ფოტო: Balkan Insight

ამასობაში, სერბეთის ქალაქებში ყოველდღიური პროტესტი გრძელდება.