7 აპრილს, ქართული ოცნების პრემიერმინისტრმა, ირაკლი კობახიძემ იუსტიციის ახალი მინისტრი პაატა სალია იუსტიციის სამინისტროს თანამშრომლებს წარუდგინა.

კობახიძემ ახალი იუსტიციის მინისტრი დაახასიათა, როგორც "არა მხოლოდ ძალიან კარგი პროფესიონალი, არამედ კეთილსინდისიერი ადამიანი" და დასძინა, რომ დარწმუნებულია პაატა სალია არაჩვეულებრივი იუსტიციის მინისტრი იქნება.

"პაატა სალია არის ერთ-ერთი ყველაზე წარმატებული ადვოკატი საქართველოში. ის წლების განმავლობაში აწარმოებდა ძალიან წარმატებულ საადვოკატო საქმიანობას, არის ერთ-ერთი ყველაზე მაღალკვალიფიციური იურისტი ჩვენს ქვეყანაში. ბოლო თვეების განმავლობაში ის იყო ჩვენი პოლიტიკური გუნდის, საქართველოს პარლამენტის წევრი და ახლა უკვე იკავებს საქართველოს იუსტიციის მინისტრის თანამდებობას. მას აქვს ყველა თვისება იმისათვის, რომ ღირსეულად უხელმძღვანელოს ამ განსაკუთრებული მნიშვნელობის მქონე უწყებას ჩვენს ქვეყანაში. ის არის არა მხოლოდ ძალიან კარგი პროფესიონალი, არამედ კეთილსინდისიერი ადამიანი. დარწმუნებული ვარ, რომ ის იქნება არაჩვეულებრივი იუსტიციის მინისტრი“, — განაცხადა ირაკლი კობახიძემ.

კობახიძისგან წარდგენის შემდეგ, პაატა სალიამ ოცნების პრემიერმინისტრ მადლობა გადაუხადა ნდობისთვის და დასძინა, რომ ის საზოგადოებას და ირაკლი კობახიძეს ჰპირდება, რომ ხალხს ღირსეულად ემსახურება.

"ჩემთვის დიდი პატივია, ვიყო იმ გუნდის წევრი, რომელსაც თქვენ ხელმძღვანელობთ, რომლის ლიდერიც თქვენ ბრძანდებით, ჩემთვის პატივია, ვიყო იუსტიციის მინისტრი და საქართველოს მთავრობის წევრი. რა თქმა უნდა, მე მესმის და სრულად ვაცნობიერებ, რაოდენ დიდი პასუხისმგებლობაა, იყო საქართველოს იუსტიციის მინისტრი.

ვპირდები საზოგადოებას, გპირდებით თქვენ, ბატონო პრემიერო, რომ ღირსეულად ვემსახურები ამ თანამდებობაზე ჩვენს ხალხსა და ქვეყანას, ღირსეულად გავუმკლავდებით ნებისმიერ გამოწვევას, რომელიც ჩვენს წინაშე იქნება, ამაში თქვენი დიდი იმედი მაქვს," — განაცხადა პაატა სალიამ.

შეგახსენებთ, იუსტიციის მინისტრის პოსტს ანრი ოხანაშვილი იკავებდა. 2 აპრილს, ქართულ ოცნებაში რეორგანიზაციის შემდეგ, ანრი ოხანაშვილმა სუს-ის უფროსის თანამდებობა დაიკავა.