ძლიერი საქართველოს ერთ-ერთმა ლიდერმა, ბადრი ჯაფარიძემ საქალაქო სასამართლოს გადაწყვეტილება, 50 000-ლარიანი გირაო, სააპელაციოში გაასაჩივრა.

ბადრი ჯაფარიძეს საქალაქო სასამართლომ გირაო ნაციონალური მოძრაობის საქმიანობის შემსწავლელ დროებით საგამოძიებო კომისიაზე არ გამოცხადების გამო შეეფარდა. მას ბრალი სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

სააპელაციოს გადაწყვეტილების მისაღებად 24-საათიანი ვადა აქვს. კოლეგიას შეუძლია, სხდომის გარეშე თქვას, იყო თუ არა ბადრი ჯაფარიძისთვის შეფარდებული გირაო სამართლიანი.

"დღეს გავასაჩივრეთ ბადრი ჯაფარიძის მიმართ აღკვეთის ღონისძიების სახე, რომელიც გირაოს სახით იქნა გამოყენებული. ჩვენ მივიჩნევთ, რომ გადაწყვეტილება არის დაუსაბუთებელი და უკანონო. არანაირი მტკიცებულება პროკურატურის მხრიდან არ არის წარმოდგენილი, რომ აღნიშნული კომისია იყო უფლებამოსილი და შესაბამისად, არაუფლებამოსილი კომისიის მოთხოვნა არის უკანონო. სწორედ ამაზე შევიტანეთ საჩივარი," — განაცხადა ბადრი ჯაფარიძის ადვოკატმა.

შეგახსენებთ, 2 აპრილს, თბილისის საქალაქო სასამართლოში კოალიცია ძლიერი საქართველოსთვის ერთ-ერთ ლიდერს, მამუკა ხაზარაძესაც აღკვეთის ღონისძიების სახით 50 000-ლარიანი გირაო შეეფარდა.

მამუკა ხაზარაძის განცხადებით, ადვოკატებთან მოლაპარაკებების შემდეგ გადაწყვეტს, გადაიხდის თუ არა სასამართლოს მიერ დაკისრებულ 50 000-ლარიან გირაოს.

ცნობისთვის, 21 მარტის წინა ხელისუფლების საქმიანობის შემსწავლელი კომისიის სხდომის დაწყებისას კომისიის თავმჯდომარემ, თეა წულუკიანმა განაცხადა, რომ პარლამენტის საგამოძიებო კომისიის სხდომაზე გამოუცხადებლობა სისხლის სამართლის პასუხისმგებლობას იწვევს, რაც ჯარიმას ან თავისუფლების 1 წლით აღკვეთას გულისხმობს.