აქამდე აღმოჩენილი ექსოპლანეტები ანუ მზის სისტემის გარეთ მდებარე პლანეტები რამდენიმე მილიარდი წლის ასაკის იყვნენ, რაც ასტრონომებს პლანეტების ფორმაციისა და განვითარების შესწავლაში ხელს უშლიდა; რადგან ეს იგივეა, რომ სწავლობდე ადამიანების განვითარებას, მხოლოდ ზრდასრულებზე დაკვირვებით.

ათასობით ექსპოლანეტას შორის, K2-33b პირველია, რომლის წლოვანებაც ასტრონომიულ შკალაზე ჩვილი ბავშვის ასაკს უტოლდება. K2-33 სისტემაში არსებული ეს პლანეტა სულ რაღაც 5-10 მილიონი წლისაა და ჯერ კიდევ ჩამოყალიბების პროცესშია. შედარებისთვის, დედამიწა 4.5 მილიარდი წლისაა.

K2-33b ათჯერ უფრო ახლოს მდებარეობს თავის ვარსკვლავთან, ვიდრე მერკური მზესთან, ხოლო მისი ორბიტა 5 დღეს მოიცავს. ახალშობილი პლანეტა ზომაში ნეპტუნზე ოდნავ დიდია. აღმოჩენა თავდაყირა აყენებს პლანეტების მიგრაციის თეორიას, რომლის მიხედვითაც დიდი მასისა და ზომის პლანეტები ვარსკვლავებთან ახლოს ვერ ყალიბდებიან.