საქართველოში ტურისტული ბიზნესის კეთებით უფრო და უფრო მეტი ადამიანი ინტერესდება. წარმატებულ ბიზნესს რთული მექანიზმი აქვს. მას მხოლოდ კარგი გუნდი და საკმარისი ფული არ შველის, მასთან ერთად კარგი ალღო და კრეატიული მიდგომაა საჭირო. იმისთვის, რომ თქვენი ტურისტული ბიზნესი წარმატებული იყოს, სხვა მრავალ კომპონენტთან ერთად, ხუთ აუცილებელ გამოწვევას უნდა გასცეთ ადეკვატური პასუხი.

1. კარგად ჩამოყალიბებული ბიზნეს კონცეფცია

სანამ ამა თუ იმ ბიზნესში ფულის ჩადებას გადაწყვეტთ, კარგად გაანალიზეთ, რამდენად დიდია ბაზარზე მოთხოვნა. ხშირად ისე ხდება, რომ რაიმე იდეით შეპყრობილ დამწყებ ბიზნესმენებს იმედები უცრუვდებათ, რადგან წაგებაში რჩებიან. სინამდვილეში ეს იმის ბრალია, რომ ისინი ბიზნესს ვიწროდ, მხოლოდ საკუთარი გადმოსახედიდან უყურებენ. ასეთი შეცდომა არასოდეს დაუშვათ. სანამ კომპანიას დაარეგისტრირებთ და ინვესტიციას განახორციელებთ, ჰკითხეთ თქვენს მეგობრებს, ქუჩაში უბრალო გამვლელებს ან ექსპერტებს, იქნებოდნენ თუ არა თქვენი სერვისის მომხმარებლები.

მეორე და აუცილებელი ეტაპია ბაზრის ანალიზი და კონკურენტების შესწავლა. თქვენი მთავარი მოვალეობაა გაარკვიოთ, არსებობენ თუ არა ამ ბიზნესში თქვენი კონკურენტები. თუ კი, უნდა შეისწავლოთ მათი პლუსები და მინუსები. პლუსები უნდა გააუმჯობესოთ, ხოლო მინუსები მაქსიმალურად აღმოფხვრათ. სასურველია მათი შემოსავლების შესახებაც შეიქმნათ წარმოდგენა და დაახლოებით მაინც იცოდეთ, რამდენად შეგიძლიათ გადაასწროთ კონკურენტებს. იმ შემთხვევაში კი, თუ ბაზარზე თქვენი მსგავსი არავინაა, უფრო სიღრმისეული ანალიზი გმართებთ.

ამის შემდეგ, აუცილებლად უნდა განიხილოთ დეტალურად, თუ როგორი იქნება თქვენი ბიზნესის კონცეფცია. გახსოვდეთ, რომ იდეა და კონცეფცია ერთმანეთისგან სრულიად განსხვავებული ცნებებია. იდეა შეიძლება იყოს შაურმის ბიზნესი, მაგრამ შაურმის გაყიდვა სულ სხვა კონცეფციების დამუშავებას მოითხოვს. კარგად განსაზღვრეთ ბიუჯეტი, სტაფის სიდიდე და მოვალეობები. დაიანგარიშეთ მინიმუმ და მაქსიმუმ რამდენი დაგიჯდებათ თქვენი სერვისის შექმნა და რა ხერხებით გაავრცელებთ მას.

2. კაუცილებლად განსაზღვრეთ სამიზნე აუდიტორია

ტურისტულ ბიზნესში სამიზნე აუდიტორიის განსაზღვრა განსაკუთრებით რთული საქმეა. პირველ რიგში, თქვენ უნდა იცოდეთ, ადგილობრივებისთვის ქმნით სერვისს, უცხოელებისთვის თუ ყველასთვის? მეორე, თქვენ უცილობლად უნდა შეისწავლოთ ქვეყნის ტურისტული სტატისტიკა, თუ რომელი ქვეყნებიდან, რამდენი ხნით და რა ასაკის ადამიანები ჩამოდიან საქართველოში.

სამიზნე აუდიტორიის განსაზღვრა დაგეხმარებათ უკეთესად დაითვალოთ თქვენი ხარჯები და სავარაუდო მოგება. ამასთან, თქვენ უკეთესად შეძლებთ სერვისის შექმნას, რადგან ზუსტად გეცოდინებათ რას მოითხოვენ ამა თუ იმ კატეგორიის ადამიანები.

3. გამოიყენეთ ბრენდირება და გახადეთ თქვენი ბიზნესი ყველა სეზონზე მორგებული

იმისთვის, რომ სერვისი ბრენდად აქციოთ, აუცილებელია, რომ ყოველთვის ხელმისაწვდომი იყოს. აუცილებელი არ არის ზამთარ-ზაფხულ ერთი და იგივე საქმე აკეთოთ, პირიქით, კარგი იქნება თუ თითოეულ ტურისტულ სეზონს სხვადსხვა სერვისს მიაწვდით. მთავარია, რომ ყველაფერი, რასაც აკეთებთ, ბრენდის სახელით კეთდებოდეს.

როცა თქვენი კომპანიის სახელი მუდმივად ზედაპირზეა, ადგილობრივი და უცხოელი მომხმარებელი თანაბრად გიმახსოვრებთ, რადგან ყველა ეძებს მისთვის სასურველ სერვისს, რათა მოგზაურობა უფრო კომფორტული გახდეს.

კიდევ ერთი რამ, რაც აუცილებლად უნდა გაითვალისწინოთ, ბრენდირებაა. თქვენი ლოგო, სლოგანი, კომპანიის ფერები - ყველაფერი, რაც უმნიშვნელო გგონიათ, სინამდვილეში უმთავრესია. რაც უფრო დასამახსოვრებელია თითოეული მათგანი, მით უფრო დიდი შანსია, რომ წარმატებას მიაღწიოთ.

4. ჩართეთ თქვენს მარკეტინგულ კამპანიაში მილენიანელები

თანამედროვე მარკეტინგის ერთ-ერთი ყველაზე წარმატებული მეთოდია მილენიანელების გამოყენება ბრენდის რეკლამირებისთვის. მილენიანელები, ეს იმ ადამიანების კატეგორიაა, რომელთა ცხოვრებას სოციალურ ქსელებში ბევრი ადამიანი აკვირდება. სხვადასხვა კომპანიები მილენიანელებს საკუთარი სერვისის ან პროდუქტის დარეკლამებას, გარკვეული საფასურის სანაცვლოდ სთხოვენ.

მილენიანელებს აქვთ უნარი, მის მიმდევრებს ესა თუ ის სერვისი შეაყვარონ და თქვენი ერთგული მომხმარებლები გახადონ. მართალია, ეს კამპანია არც თუ ისე იაფი ჯდება, მაგრამ ხანგრძლივ პერსპექტივაში კარგ შედეგს იძლევა და თუ თქვენი კომპანიის ბიუჯეტი ამის საშუალებას გაძლევთ, ხელიდან არ უნდა გაუშვათ.

5. აქტიურად გამოიყენეთ ინტერნეტის შესაძლებლობები

თანამედროვე ბიზნესში წარმატების მიღწევა ციფრული შესაძლებლობების გამოყენების გარეშე ფაქტობრივად წარმოუდგენელია. ამ შემთხვევაშიც, მიდგომა საკმაოდ კომპექსურია და კარგ მენეჯმენტს საჭიროებს. არ არის საკმარისი, რომ უბრალოდ ფეისბუქის გვერდი შექმნათ და მოწონებები დააგროვოთ. ფეისბუქი, ისევე როგორც სხვა სოციალური ქსელები, სპეციალურად დაწერილ ალგორითმებს ემსახურებიან და თქვენი სოც.ქსელის მარკეტინგული კამპანია ამ წესების მიხედვით უნდა წარმართოთ. ამ ყველაფერს კი, სპეფიციური ცოდნა სჭირდება, რისთვისაც სპეციალისტის დაქირავება ან ამ ტექნოლოგიების შესწავლა მოგიწევთ.

აღსანიშნავია, რომ კარგად დაგეგმილი სოციალური მედია მარკეტინგი ნებისმიერი ბრენდის წარმატებაში უდიდეს როლს ასრულებს, ასე რომ, ნუ დაზოგავთ ამისთვის ბიუჯეტს.