თუ შენთვისაც ნაცნობია სიტუაცია, როცა მაღაზიაში პურის საყიდლად შესული, იქიდან რამდენიმე სავსე ჩანთითა და უამრავი არასაჭირო პროდუქტით გამოსულხარ, მაშინ ეს ბლოგი შენთვისაა.

საკუთარი თავისთვის (და უფრო ხშირად — საფულისთვის) მოწყობილი ამ დივერსიის მთავარი ავტორი ყოველთვის შიმშილია.

ფოტო: Freepik

როგორ გვმართავს შიმშილი საყიდლების დროს?

როცა გვშია, ჩვენი ტვინი რაციონალურ აზროვნებას წყვეტს და გადარჩენის რეჟიმზე გადადის. ამ დროს ორგანიზმი ენერგიის მიღების სწრაფ წყაროს ეძებს, რის გამოც, სრულიად გაუცნობიერებლად, ტკბილი, არაჯანსაღი, ცხიმიანი და მაღალკალორიული პროდუქტები გვიზიდავს.

სწორედ ამ დროს ვავსებთ კალათას ისეთი პროდუქტებით, რომლებსაც "მინდას" მიხედვით ვარჩევთ და არა იმის მიხედვით, რაც რეალურად გვჭირდება. თითქოს სხეული იმას გვკარნახობს, რომ ჩიფსს არაჟნისა და ხახვის არომატით, ანდაც ბრჭყვიალა ქაღალდში შეფუთულ შოკოლადს, ჩვენი გადარჩენა შეუძლია.

სუპერმარკეტიც ისეა მოწყობილი, რომ ჩვენი ეს მდგომარეობა მაქსიმალურად გამოიყენოს — თვალში ადვილად მოსახვედრი ფერადი შეფუთვები, გემრიელი სურნელი და მიმზიდველი აქციები, რომლებზე უარის თქმაც მშიერი ადამიანისთვის განსაკუთრებულად რთულია.

შიმშილი რაღაცნაირად ახერხებს, რომ რაციონალური აზროვნება შეგვინელოს (ან გაგვიქროს) და ინსტინქტურად მოქმედებაზე გადაგვიყვანოს. ინსტინქტი კი ამ დროს მხოლოდ იმას გვკარნახობს, რომ მეტი გვინდა. შედეგად, სალაროს რიგში ზოგჯერ არა მხოლოდ ზედმეტი საკვებით, არამედ ისეთი ნივთებით ხელში ვდგებით, რომლებზეც ვერასდროს ვიფიქრებდით, რომ ოდესმე დაგვჭირდებოდა.

თუმცა, პრობლემა მხოლოდ ზედმეტად დახარჯული ფული არ არის. ყველაზე დიდი ზიანი ამ დროს ჩვენს ჯანმრთელობასა და ცხოვრების ჯანსაღ წესს ადგება, რომლის დამკვიდრებსაც დიდი ხანია ვცდილობთ.

ჯანსაღი კვება, პირველ რიგში, გააზრებული არჩევანია. როცა მაღაზიაში დანაყრებული შედიხარ, შენი გონება იმაზეა ორიენტირებული, რომ სასარგებლო, ხარისხიანი და ჯანსაღი პროდუქტი შეიძინო: მეტი ბოსტნეული, ცილა — ყველაფერი, რაც ორგანიზმს ენერგიით ავსებს. მშიერი ტვინისთვის კი მხოლოდ "სწრაფი ენერგია" არსებობს.

რეალურად, არაჯანსაღ საკვებთან ჩვენი ბრძოლის ბედი სწორედ სუპერმარკეტის შესასვლელთან წყდება. თუ შიმშილს უფლებას არ მისცემ, გადაწყვეტილებები შენ ნაცვლად მიიღოს, ჯანსაღი კვება გააზრებული და მშვიდი არჩევანი გახდება.

გამოსავალი, რა თქმა უნდა, არსებობს — სანამ მაღაზიაში შეხვალ, თუნდაც ერთი ვაშლით ან ცოტა თხილით წაიხემსე. ამ მარტივი ხრიკის გამოყენებით, შენს ტვინს რაციონალურად აზროვნების საშუალებას მისცემ.

გახსოვდეს, საკუთარ თავსა და ჯანმრთელობაზე ზრუნვა სწორედ ასეთი პატარა დეტალებისგან შედგება.