ოცნების სატელიტი პარტია ხალხის ძალის დეპუტატმა და დიდი ბრიტანეთის მიერ სანქცირებული პროპაგანდისტული ტელევიზია "პოსტვ"-ის ერთ-ერთმა მფლობელმა ვიქტორ ჯაფარიძემ "ტვ პირველთან" საუბრისას განაცხადა, რომ სანქცირების შემდეგ ტელევიზიას ხელფასების ჩარიცხვაზე პრობლემები არ იქნება.

"ბრიტანეთის ხელისუფლების გადაწყვეტილებას ძალიან ცუდად ვაფასებ. ალბათ ის არ მოეწონათ, რომ კამიტის გამო ჩვენმა ქვეყანამ მათ მატყუარა ტელევიზიას პრეტენზიები გამოუთქვა.

ბრიტანელებმა უნდა გადაგვიწყვიტონ, რომელ ტელევიზიას უნდა უყუროს ქართველმა მოსახლეობამ? არ მაინტერესებს მაგათი აზრი. ქართული ბანკები შებოჭილები არ იქნებიან, ეს ორი ბანკია შებოჭილი, იმიტომ რომ აგენტურის, ბრიტანელების ბანკები არიან. ხელფასების ჩარიცხვაზე პრობლემები არ იქნება. ხელფასებს ყველა ბანკი გასცემს, რა პრობლემაა.

... ეგ არის თქვენი ბრიტანული დემოკრატია. არ არის თქვენი საქმე (მაქვს თუ არა ქართუ ბანკთან კომუნიკაცია). გასკდით გულზე, არაფერზე [რეკლამებზეც] არ იქნება პრობლემა," — თქვა ვიქტორ ჯაფარიძემ.

მანამდე bm.ge-იმ დაწერა, რომ ტელევიზიის სანქცირებამდე 25 დღით ადრე ვიქტორ ჯაფარიძემ "პოსტვ"-ის წილი მართვაში სხვა პირს გადასცა.

"დეპუტატმა ვიქტორ ჯაფარიძემ, რომელმაც ტელეკომპანიის წილი 2022 წლის ოქტომბერში, 520 000 ლარად შეისყიდა მფლობელთან ერთად წილის მმართველიც იყო 2026 წლის 30 იანვრამდე. 24 დღის წინ კი ამონაწერი განახლდა და კომპანიის წილის მმართველად ზაზა მარიდაშვილია მითითებული.

სამეწარმეო რეესტრის მიხედვით მარიდაშვილი რაგბის კლუბი იბერიონის დირექტორიცაა",— წერს bm.ge.

დღეს ვიქტორ ჯაფარიძის კომენტარი გაავრცელა პირველმა არხმაც. საზოგადოებრივი მაუწყებლის მიერ გავრცელებულ კომენტარში ჯაფარიძე ამბობს, რომ ტელეკომპანია პოსტვ-ის წილი არ დაუთმია და ამის გაკეთებას არ აპირებს, თუმცა იმასაც აღნიშნავს, რომ ტელეკომპანიის მისი კუთვნილი წილი მართვაში გადასცა კონკრეტულ პირს, რათა მისი საქმიანობა წინააღმდეგობაში არ მოდიოდეს კანონმდებლობასთან.

"მინდა, გამოვეხმაურო ზოგიერთი ე.წ. მედიასაშუალებისა და ე.წ. ჟურნალისტის მიერ გავრცელებულ ცრუ ინფორმაციას, თითქოს დავთმე ჩემი კუთვნილი წილი ტელეკომპანია "პოსტვ"-ში და თითქოს ეს გავაკეთე, რადგან წინასწარ მქონდა ინფორმაცია ბრიტანეთის მხრიდან ტელეკომპანიის მოსალოდნელ დასანქცირებაზე. პირველ რიგში, მკაფიოდ მინდა, განვაცხადო, რომ არ დამითმია ტელეკომპანია "პოსტვ"-ის ჩემი წილი, ამის გაკეთებას არც მომავალში ვაპირებ, რადგან მიმაჩნია, რომ მოცემული ტელეარხი ემსახურება სიმართლეს. ამიტომაც მას ჩემი მხარდაჭერა სულ ექნება. სინამდვილეში, ვინაიდან ვარ საქართველოს პარლამენტის წევრი და არ მაქვს უფლება, ვმართავდე ბიზნესს (აქვე აღვნიშნავ, რომ ტელეკომპანიის სარედაქციო პოლიტიკაში არც არასდროს ჩავრეულვარ), როგორც კანონმორჩილმა მოქალაქემ, ტელეკომპანიის ჩემი კუთვნილი წილი მხოლოდ და მხოლოდ მართვაში გადავეცი კონკრეტულ პირს, რათა ჩემი საქმიანობა არ მოდიოდეს წინააღმდეგობაში კანონმდებლობასთან (საქართველოს პარლამენტის რეგლამენტის მე-10 მუხლი). ამიტომ, მინდა, აღვნიშნო, რომ სრული სიცრუე და საფუძველს მოკლებულია რადიკალების სიხარული, თითქოს ტელეკომპანია "პოსტვ"-ის წილს აღარ ვფლობ. როგორც ზემოთაც აღვნიშნე, ამ წილის დათმობას არც მომავალში ვაპირებ. აქვე, სრულ მხარდაჭერას გამოვხატავ ტელეკომპანიის თითოეული თანამშრომლის მიმართ, ვისაც ურთულეს პირობებში უწევს, ემსახუროს სიმართლეს და ამას ნამდვილად ღირსეულად აკეთებენ", — აცხადებს ვიქტორ ჯაფარიძე.

შეგახსენებთ, დიდმა ბრიტანეთმა, რუსეთის სანქციების რეგულაციების ფარგლებში, სამთავრობო პროპაგანდისტული "იმედი" და "პოსტვ" 24 თებერვალს დაასანქცირა.