"ძალიან სასაცილოა იმის წარმოდგენა, რომ "პოსტვ" და "იმედი" თურმე ისეთი გავლენიანები არიან, რომ მსოფლიო არენაზე განსაზღვრავენ იმას, თუ ვინ რას იფიქრებს უკრაინის შესახებ",— ამის შესახებ ოცნების სატელიტი პარტიის, ხალხის ძალის დეპუტატმა, ეკა სეფაშვილმა განაცხადა და დიდი ბრიტანეთის მიერ პროსამთავრობო, პროპაგანდისული მედიების "იმედისა" ად "პოსტვ"-ის დასანქცირებას გამოეხმაურა.

მისი თქმით ტელევიზიების სანქცირება დიდი ბრიტანეთის მცდელობაა, როგორმე საქართველოს ხელისუფლება და ხალხი აიძულონ, რომ "საქართველოს დაღუპვის გადაწყვეტილებას მოაწერონ ხელი". მისივე თქმით, ამ არხებზე არავითარი დეზინფორმაცია არ არის არასდროს გასული და ის არხები, რომლებიც მართლაც დეზინფორმაციას ავრცელებენ, განაგრძობენ საქართველოში ფუნქციონირებას და მათთვის ბრიტანეთი "ვერ იცლის".

"დიდ ბრიტანეთის მიერ "იმედის" და "პოსტვ"-ის დასანქცირება სასოწარკვეთილი მცდელობაა, როგორმე საქართველოს ხელისუფლება და ხალხი აიძულონ, რომ ხელი მოაწერონ საქართველოს დაღუპვის გადაწყვეტილებას.

ძალიან სასაცილოა იმის წარმოდგენა, რომ "პოსტვ" და "იმედი" თურმე ისეთი გავლენიანები არიან, რომ მსოფლიო არენაზე განსაზღვრავენ იმას, თუ ვინ რას იფიქრებს უკრაინის შესახებ. ამ არხების მიმართ უდიდესი პატივისცემის მიუხედავად, რაც გამოიხატება იმაში, რომ სიმართლეს ავრცელებენ და უდიდესი როლი შეასრულეს საქართველოში მშვიდობის დაცვის საქმეში, სიმართლე ის არის, რომ ეს ორი არხი გამიზნულია ქართული პოლიტიკისთვის, ქართველი მოსახლეობისთვის და მათ მიერ გავრცელებული ინფორმაციები, პირველ ყოვლისა, მიმართულია ქართველ საზოგადოებაზე.

ძალიან ღიმილის მომგვრელია სანქცირება იმისთვის, რომ თურმე ეს ორი არხი ხელს უწყობს უკრაინის შესახებ დეზინფორმაციის გავრცელებას. ეს არის დიდი ტყუილი — ამ არხებზე არავითარი დეზინფორმაცია არ არის არასდროს გასული. ის არხები კი, რომლებიც მართლაც დეზინფორმაციას ავრცელებენ, განაგრძობენ საქართველოში ფუნქციონირებას — რატომღაც მათ შესახებ ვერ იცლის ბრიტანეთი", — თქვა ეკა სეფაშვილმა.

ეკა სეფაშვილმა აღნიშნა, რომ დეზინფორმაცია და ტყუილი ძალიან მოკლევადიანი სტრატეგიაა და სიმართლე და ფაქტების რეალურად ასახვა ის სტრატეგიაა, რასაც "პოსტვ" და "იმედი" ახორციელებს. მისივე თქმით, არავითარ სანქციებს არ ექნება ძალა.

"საზოგადოებას შევახსენებ, რომ დიდი ბრიტანეთი ის სახელმწიფოა, სადაც მათი საზოგადოებრივი მაუწყებლის მიერ თავიდან ბოლომდე დეზინფორმაციაზე აგებული ფილმი მომზადდა იმის შესახებ, რომ საქართველოში ,"კამიტი" გამოიყენეს. ამ ტყუილი ნარატივის გავრცელებისთვის მათ უამრავი ფული დახარჯეს და ახლა ძალიან შეწუხებული და შეშფოთებულები არიან, რომ ამდენი დანახარჯის მიუხედავად მათმა დეზინფორმაციამ საწადელს ვერ მიაღწია. რეალობა ერთია — დეზინფორმაცია და ტყუილი ძალიან მოკლევადიანი სტრატეგიაა და სიმართლე და ფაქტების რეალურად ასახვა ის სტრატეგიაა, რასაც ახორციელებს "პოსტვ" და "იმედი".

ეს არის მათი დიდი და მზარდი რეიტინგების საიდუმლო. დარწმუნებული ვარ, ეს არხები კვლავ გააგრძელებენ ამ მიმართულებით მუშაობას და არავითარი სანქციები არ იქნება ძალა, რომელიც შეაჩერებს ამ არხების მაუწყებლობას და იმ დიდ საქმის, რომელსაც ეწოდება ამ არხების წვლილი საზოგადოების ინფორმირებულობაში, რაც ამ მღელვარე ეპოქაში უმნიშვნელოვანესია, რადგან სწორედ სიმართლით შეიარაღებული საზოგადოებაა ის ძალა, რომელიც უპირისპირდება ქაოსს, არეულობას და ომს საქართველოში", — თქვა ეკა სეფაშვილმა [განცხადებას IPN ავრცელებს].

შეგახსენებთ, დიდმა ბრიტანეთმა, რუსეთის (EU Exit) სანქციების რეგულაციების ფარგლებში, სამთავრობო პროპაგანდისტული "იმედი" და "პოსტვ" 24 თებერვალს დაასანქცირა.