გერმანიის ელჩი საქართველოში, პეტერ ფიშერი დიდი ბრიტანეთის მიერ სამთავრობო პროპაგანდისტული მედიების "იმედისა" და POSTV-ის დასანქცირებას გამოეხმაურა.

მისი თქმით, ეს ტელეარხები ძირითადად პროპაგანდას და ისეთ ნარატივს ავრცელებენ, რომელიც საკმაოდ ახლოსაა რუსულ ნარატივთან. მისივე თქმით, "ისინი ცრუობენ იმ მიზეზთან დაკავშირებით, რის გამოც ეს სამხედრო აგრესია დაიწყო, ისინი ცრუობენ, რომ რუსეთი აუცილებლად მოიგებს ომს, რაც ასე არ არის და რუსეთი ამ ომს ვერ მოიგებს. ისინი ცრუობენ გერმანიის შესახებ, ცრუობენ ევროკავშირის შესახებ, ცრუობენ გაერთიანებული სამეფოს, დასავლეთის შესახებ"

"ამის შესახებ რამდენიმე წუთის წინ გავიგე. შევამოწმე ჩემი ტელეფონი და ვნახე, რომ "იმედი" და POSTV გაერთიანებული სამეფოს მიერ დღეს გავრცელებული სანქციების პაკეტის ნაწილი არიან. ეს გაერთიანებული სამეფოს საქმეა და ამიტომ მხოლოდ მცირე კომენტარით შემოვიფარგლები. ზუსტად არ ვიცი, რას გულისხმობს, რას ნიშნავს ამ ორი არხისთვის, მაგრამ ჩემი აქ ყოფნის პერიოდში შევნიშნე, რომ ესენი არიან ტელეარხები, რომლებიც ავრცელებენ ძალიან მცირე ახალ ამბავს და რომლებიც, ძირითადად, ავრცელებენ პროპაგანდას. ისინი ავრცელებენ ნარატივს, რომელიც საკმაოდ ახლოსაა რუსულ ნარატივთან. ჩვენ ამ პანელზე განვიხილეთ, რომ დეზინფორმაცია უკრაინაში რუსეთის აგრესიის ნაწილია. ისინი ცრუობენ იმ მიზეზთან დაკავშირებით, რის გამოც ეს სამხედრო აგრესია დაიწყო, ისინი ცრუობენ, რომ რუსეთი აუცილებლად მოიგებს ომს, რაც ასე არ არის და რუსეთი ამ ომს ვერ მოიგებს. ისინი ცრუობენ გერმანიის შესახებ, ცრუობენ ევროკავშირის შესახებ, ცრუობენ გაერთიანებული სამეფოს, დასავლეთის შესახებ. საინტერესოა ევროკავშირთან დაკავშირებით, როდესაც საქართველო აცხადებს, რომ სურს გაწევრიანება, ყოველ ჯერზე, ყოველ დღე, ისინი უხსნიან "იმედისა" და POSTV-ის მაყურებელს, რომ ევროკავშირი საშინელია. აი, ეს არის რისი თქმაც მსურს ამ პროპაგანდისტული ტელეარხების შესახებ", — განაცხადა ფიშერმა (თარგმანს IPN ავრცელებს).

კითხვაზე, არის თუ არა მოსალოდნელი, რომ სანქციები მომავალში ევროკავშირმაც დააწესოს, პეტერ ფიშერმა უპასუხა: "ჩვენც მივიღეთ სანქციები უცხოური ინფორმაციით მანიპულირებისა და ჩარევის შესახებ, ასე რომ ვცდილობთ, მივიღოთ საპასუხო ზომები დეზინფორმაციის წინააღმდეგ, რომელიც ყოველ დღე ძალიან ძლიერი, ძალიან აგრესიულია".

"რუსეთთან დაკავშირებული ქსელები ცდილობენ ჩვენი საზოგადოებისთვის ძირის გამოთხრას, ჩემი საზოგადოებისთვის, რომელშიც მე ვცხოვრობ. სწორედ ამიტომ, მე, როგორც მოქალაქეს არ მომწონს ეს. ასე რომ, თეორიულად ეს შესაძლებელია", — განაცხადა ფიშერმა.