ყოფილი პარლამენტარი, სებ-ის ყოფილი ხელმძღვანელი რომან გოცირიძე დიდი ბრიტანეთის მიერ სამთავრობო პროპაგანდისტული მედიების "იმედისა" და POSTV-ის დასანქცირებას სოციალურ ქსელში გამოეხმაურა.

მისი განმარტებით, სანქციების გამო აღნიშნული ტელევიზიები ვერ მოიზიდავენ რეკლამას, ვერ გასცემენ ხელფასებს, ვერ გადარიცხავენ ფულს უცხოეთში. მისივე თქმით, დროებითი გამოსავალი შეიძლება იყოს ჩინური არხების ამოქმედება, მაგრამ როგორც რომან გოცირიძე ამბობს, ეს მექანიზმი ჯერ არაა გამართული და არცერთი სერიოზული ჩინური ბანკი ამ რისკზე არ წავა. მისივე თქმით, "წილი ვინც იჩუქა, იმისი ბიზნესიც "იმედს" ჩაჰყვა სამარეში."

"რას ნიშნავს "იმედის" დასანქცირება:

— ვერ მოიზიდავენ რეკლამას;

— ვერ დაასუბსიდირებს ივანიშვილი (მანამდე რუხაძეც), რადგან ხარჯების უდიდეს ნაწილს ისინი ფარავდნენ. რეკლამა ხელფასებსაც კი არ ჰყოფნიდა;

— ვერ გასცემენ ხელფასებს;

— ვერ გადარიცხავენ უცხოეთში ვერსად ფულს, მათ შორის სატელიტის მომსახურებისათვის;

— ლარში მომსახურებასაც კი ვერ გაბედავს ვერც ერთი სერიოზული ბანკი, რადგან ბარათები ვიზაზე და მასტერქარდზეა მიბმული;

დროებითი გამოსავალი? ჩინური არხების ამოქმედება, რაც ეროვნულმა ბანკმა ახლახან გვამცნო, მაგრამ ეს მექანიზმი ჯერ არაა გამართული და არცერთი სერიოზული ჩინური (არაბული) ბანკი ამ რისკზე არ წავა. დარჩა რუსული და ირანული ბანკები. იქ რომ ფული დაიდოს, ტომრებით უნდა ზიდონ აქედან.

მოკლედ, შავ დღეში არიან.

წილი ვინც იჩუქა, იმისი ბიზნესიც "იმედს" ჩაჰყვა სამარეში.

ჯერ სადაა, ეს მხოლოდ დასაწყისია. ახლა უკვე სხვების რიგია", — დაწერა რომან გოცირიძემ.