ოკუპირებული ცხინვალის რეჟიმის მიერ დაკავებული თამარ მეარაყიშვილის მშობლების სახლი უცნობმა პირებმა გაჩხრიკეს და ტელეფონები ჩამოართვეს. სახლში ოქროს ეძებდნენ და ფოტონეგატივების აღმოჩენის შემდეგ დაინტერესდნენ, სად მუშაობდა მეარაყიშვილის და. ამის შესახებ ინფორმაციას "რადიო თავისუფლება" ავრცელებს.

მათთან საუბრისას, მეარაყიშვილმა განაცხადა, რომ მისი მშობლები ცხინვალის რეჟიმის მსხვერპლნი არიან.

"შეწყვიტეთ ეს განუკითხაობა. რაც ჩემს მშობლებსა და ოჯახს შეიძლება დაემართოს, გთხოვთ, ალან ედუარდოვიჩ გაგლოევს დააბრალოთ. ჩემ წინააღმდეგ მოქმედება მან იმიტომ დაიწყო, რომ გამოვავლინე მისი ჩინოვნიკების მიერ ჩვენს რაიონში განხორციელებული კორუფციული სქემები. ჩემი ყველა განცხადება და ფაქტი ეფუძნება როგორც რუსეთის, ასევე სამხრეთ ოსეთის აუდიტის შედეგებს," — განაცხადა მეარაყიშვილმა რადიო თავისუფლებასთან საუბრისას.

მეარაყიშვილის განცხადებით, ცხინვალში ადგილობრივი ექიმები მისი მშობლების ჯანმრთელობის მდგომარეობით მოულოდნელად დაინტერესდნენ. სასწრაფო დახმარების ბრიგადამ დედამისი სახლში გასინჯა, მამა კი ქუჩიდან წაიყვანეს კლინიკაში გამოკვლევებზე.

შეგახსენებთ, თამარ მეარაყიშვილი 22 დეკემბერს შპიონაჟის ბრალდებით დააკავეს. ოკუპირებული ცხინვალის საქალაქო სასამართლომ 24 დეკემბერს მას 2-თვიანი წინასწარი პატიმრობა შეუფარდა. პროტესტის ნიშნად ის მშრალ შიმშილობაზე იმყოფებოდა.

ქართველი აქტივისტი თამარა მეარაყიშვილი ერთ წელზე მეტია ვერ იღებდა ახალ პასპორტს, რაც მას ოკუპირებული სამხრეთ ოსეთის ფარგლებში გადაადგილებასა და დასაქმებაში ხელს უშლიდა. ის მიიჩნევს, რომ ხელისუფლების ქმედებები სოციალურ მედიაში მის კრიტიკულ პოსტებს უკავშირდება.