აშშ-მა დაკავებული ტანკერ Marinera-ს ეკიპაჟიდან რუსეთის 2 მოქალაქე გაათავისუფლა. ამის შესახებ რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა.

"ჩვენი მოთხოვნის საპასუხოდ, აშშ-ის პრეზიდენტმა დონალდ ტრამპმა გადაწყვიტა, გაეთავისუფლებინა Marinera-ს ტანკერის ეკიპაჟიდან რუსეთის ორი მოქალაქე, რომლებიც ადრე აშშ-მა ჩრდილო ატლანტიკაში ოპერაციის დროს დააკავა. ჩვენ მივესალმებით ამ გადაწყვეტილებას და მადლიერებას ვუცხადებთ აშშ-ის ხელმძღვანელობას", — თქვა მან.

მისივე თქმით, ამჟამად მიმდინარეობს პრაქტიკული სამუშაოები დანარჩენების სამშობლოში სწრაფი დაბრუნების უზრუნველსაყოფად.

ამერიკელმა სამხედრო მოსამსახურეებმა Marinera 7 იანვარს დააკავეს. რუსული მედიის ცნობით, დაკავებული ტანკერების ეკიპაჟის 28 წევრიდან, 6, მათ შორის კაპიტანი, ქართველია. გუშინ საქართველოს საგარეო უწყებაში და საზღვაო ტრანსპორტის სააგენტოში აცხადებდნენ, რომ ამ საკითხთან დაკავშირებით ინფორმაციას აზუსტებდნენ.

"2026 წლის 7 იანვარს აშშ-ის მიერ ატლანტის ოკეანეში დაკავებული ტანკერის Marinera-ს ეკიპაჟის შემადგენლობაში საქართველოს მოქალაქეების ყოფნასთან დაკავშირებით ღია წყაროებში გავრცელებული ინფორმაციის დასაზუსტებლად საქართველოს საგარეო საქმეთა სამინისტრო ახორციელებს შესაბამის სამუშაოებს. ამ ეტაპზე საგარეო საქმეთა სამინისტროში ცნობა საქართველოს მოქალაქეების დაკავებასთან დაკავშირებით არ შემოსულა", — ნათქვამია საგარეო უწყების განცხადებაში.

აშშ-ის ევროპული სარდლობა აცხადებს, რომ ტანკერი "აშშ-ის სანქციების დარღვევის" გამო დააკავეს. თეთრი სახლის პრესმდივნის, კეროლინ ლევიტის თქმით, მის ეკიპაჟს შესაძლოა სისხლის სამართლის ბრალდება წაუყენონ.