ტრამპის ადმინისტრაციამ ვენესუელის დროებით პრეზიდენტ დელსი როდრიგესს აცნობა, რომ რეჟიმმა თეთრი სახლის მოთხოვნები უნდა შეასრულოს იქამდე, სანამ მას ნავთობის დამატებით მოპოვებაზე ნებართვა მიეცემა. ამის შესახებ ინფორმაციას ABC News ავრცელებს.

Axios-ის ცნობით, ვენესუელამ ქვეყნიდან უნდა გააძევოს ჯაშუშობაში ეჭვმიტანილი ჩინელი, რუსი, ირანელი და კუბელი პირები და შეწყვიტოს მათთან ეკონომიკური კავშირები.

მეორე მოთხოვნაა, რომ ვენესუელა ნავთობის წარმოებაში ექსკლუზიურად აშშ-სთან პარტნიორობას უნდა დასთანხმდეს და ნავთობის გაყიდვისას უპირატესობა ამერიკას მიანიჭოს.

ABC News-ის ერთ-ერთი წყაროს თქმით, სახელმწიფო მდივანმა მარკო რუბიომ ორშაბათს, დახურულ ბრიფინგზე, კონგრესმენებს უთხრა, რომ მისი აზრით, აშშ-ს შეუძლია ვენესუელაზე ზეწოლის გაძლიერება, რადგან ქვეყანას არსებული ნავთობტანკერები უკვე სავსე აქვს. რუბიომ ასევე აღნიშნა, რომ აშშ-ის შეფასებით, კარაკასს მხოლოდ რამდენიმე კვირა აქვს დარჩენილი, სანამ ნავთობის მარაგების გაყიდვის გარეშე ფინანსურად გაკოტრდება.

ცნობისთვის, ამერიკის შეერთებული შტატების პრეზიდენტი დონალდ ტრამპმა სოციალურ ქსელში დაწერა, რომ ვენესუელის დროებითი ხელისუფლება აშშ-ის 30-დან 50 მილიონ ბარელამდე მაღალი ხარისხის სანქცირებულ ნავთობს გადასცემს. მისივე განმარტებით, აღნიშნული ნავთობი საბაზრო ფასად გაიყიდება და მიღებულ თანხებს თავად დონალდ ტრამპი გააკონტროლებს.