საქართველოს ფინანსთა მინისტრის პირველმა მოადგილემ, გიორგი კაკაურიძემ 5 ოქტომბერს 2027 წლის სახელმწიფო ბიუჯეტის პროექტის ფარგლებში მასწავლებლებისა და დამრიგებლების ხელფასების მატების საკითხი განმარტა.

EDU.ARIS.GE-სთან საუბრისას კაკაურიძემ აღნიშნა, რომ საჯარო სექტორში ანაზღაურება საშუალოდ 8.4%-ით იზრდება, ხოლო პედაგოგების შემთხვევაში ზრდა მათ საათობრივ დატვირთვაზე იქნება დამოკიდებული. გარდა ამისა, მოსალოდნელია ცვლილებები სტატუსის დანამატებსა და დამრიგებლის ანაზღაურებაზეც.

"რაც შეეხება სკოლის ხელფასებს, ზოგადად, საჯარო სექტორში მე ვახსენე, რომ ხელფასების ზრდა ამ ეტაპზე საშუალოდ ყველასთვის იქნება 8,4 პროცენტით. მასწავლებლების შემთხვევაში ანაზღაურება დამოკიდებულია საათებზე. საათზე, დაახლოებით, 2 ლარი გამოდის ზრდა ამ შემთხვევაში და ეს გასაშუალოვდება, გააჩნია საათეების რაოდენობას, ვინ რამდენი საათით არის კვირაში დაკავებული შესაბამის სასწავლო დაწესებულებაში", — განაცხადა კაკაურიძემ.

ცნობისთვის, 2027 წლიდან ხელფასები 8.4%-ით მოიმატებს საჯარო სექტორში. ამის შესახებ პარლამენტის საფინანსო-საბიუჯეტო კომიტეტის თავმჯდომარემ, პაატა კვიჟინაძემ 2027 წლის ბიუჯეტზე საუბრისას განაცხადა.