ხელოვნების სასახლის დირექტორი და საქართველოს სასახლე-მუზეუმების გაერთიანების ხელმძღვანელი გიორგი კალანდია სოციალურ ქსელში წერს, რომ საქართველოს სასახლე-მუზეუმების გაერთიანებამ აშშ-ის სახელმწიფო დეპარტამენტის ფინანსური მხარდაჭერა მოიპოვა. პროექტი ხელოვნების სასახლეში დაცული ამერიკასთან დაკავშირებული უნიკალური კულტურული მემკვიდრეობის მასშტაბურ კვლევას, სამეცნიერო დამუშავებას, გაციფრულებასა და საერთაშორისო საზოგადოებისთვის წარდგენას ითვალისწინებს.

"განსაკუთრებული მადლობა მინდა გადავუხადო აშშ-ის მთავრობას ჩვენი სამუზეუმო გაერთიანების ასეთი მხარდაჭერისათვის, დიდი მადლობა ხელოვნების სასახლის პროფესიონალთა გუნდს ამ დიდი და უაღრესად მნიშვნელოვანი გამარჯვებისათვის, გამორჩეული მადლობა საქართველოს მთავრობას და კულტურის სამინისტროს ჩვენი იდეის მხარდაჭერისა და თანადგომისათვის. მაშ ასე!

საქართველოს სასახლე-მუზეუმების გაერთიანებამ აშშ-ის სახელმწიფო დეპარტამენტის ფინანსური მხარდაჭერა მოიპოვა. პროექტი — "ამერიკული კოლექციები ხელოვნების სასახლეში და კულტურული დიალოგის ისტორია" — ხელოვნების სასახლეში დაცული ამერიკასთან დაკავშირებული უნიკალური კულტურული მემკვიდრეობის მასშტაბურ კვლევას, სამეცნიერო დამუშავებას, გაციფრულებასა და საერთაშორისო საზოგადოებისთვის წარდგენას ითვალისწინებს. პროექტი რვა თვის განმავლობაში განხორციელდება და მისი მთავარი მიზანია ხელოვნების სასახლის ამერიკული კოლექციების სისტემური შესწავლა, გაციფრულება, დამუშავება და საერთაშორისო წარდგენა, რათა წარმოჩნდეს ამერიკული კულტურის კვალი საქართველოში და ქართულ-ამერიკული კულტურული ურთიერთობების ისტორია.

გურული მხედრები ამერიკაში და ბაფალო ბილის Wild West; ჯორჯ ბალანჩინი და ამერიკული ბალეტის ისტორია; "ბალეტის შავი მარგალიტი" თამარ თუმანიშვილი და ჰოლივუდი; ქართველი მხატვარი სიმონ დადიანი ამერიკაში; ლექსო თორაძე და ვან კლიბერნი; არტურ მილერი თბილისში; ვახტანგ ჭაბუკიანის ამერიკული გასტროლები; რობერტ დე ნიროს ვიზიტი საქართველოში; ჯეიმს ბონდის სამყაროსთან დაკავშირებული მასალები; ედუარდ კურტისის გამოფენის მემკვიდრეობა-ეს მხოლოდ ნაწილია იმ უზარმაზარი თემატური სპექტრისა, რომელსაც პროექტი გააერთიანებს. პროექტის ფარგლებში დაგეგმილია არანაკლებ 500 საარქივო, ფოტოგრაფიული, აუდიოვიზუალური და სამუზეუმო ობიექტის კვლევა, სამეცნიერო აღწერა და გაციფრულება.

საქართველოს სასახლე-მუზეუმების გაერთიანებისთვის ეს პროექტი კიდევ ერთი მნიშვნელოვანი შესაძლებლობაა, რომ საქართველოსა და აშშ-ის მეგობრობისა და კულტურული ურთიერთობების შესახებ საერთაშორისო აუდიტორიას ძვირფასი მემკვიდრეობა გააცნოს და საოცარ ისტორიებს ახალი სიცოცხლე შესძინოს", — წერს გიორგი კალანდია.