პარტია ლელო — ძლიერი საქართველოს წევრი, სალომე სამადაშვილი ოცნების პარლამენტის თავმჯდომარის, შალვა პაპუაშვილის მიერ გავრცელებულ განცხადებას სოციალურ ქსელში გამოეხმაურა. სამადაშვილი წერს, რომ "პროვინციული ავტოკრატიის მსახურების" ტრამპზე საუბარი ეშინიათ. მისივე თქმით, "ვენესუელაში სპეცოპერაცია ჩაატარა ტრამპმა, მადუროს ასამართლებენ ნიუ-იორკში და არა ბრიუსელში. პაპუაშვილი კი ისევ ბრიუსელს აგინებს".

"ივანიშვილის პროვინციული ავტოკრატიის მსახურების კომიკური მდგომარეობა მძიმე საყურებელია-ტრამპზე რამის თქმა ეშინიათ... ისევ ევროკავშირს მისდგომია გერმანელი გადასახადის გადამხდელების ნასუფრალზე წლებით გამოკვებილი პაპუაშვილი.

ვენესუელაში სპეცოპერაცია ჩაატარა ტრამპმა, მადუროს ასამართლებენ ნიუ-იორკში და არა ბრიუსელში. პაპუაშვილი კი ისევ ბრიუსელს აგინებს.

ევროკავშირმა მკაფიო მოწოდება გააკეთა, საერთაშორისო სამართლებრივი ნორმების დაცვის აუცილებლობაზე.

საერთაშორისო ქარტეხილებში გადარჩება ის, ვისაც ძლიერი მოკავშირე ეყოლება. ევროკავშირში გაწევრიანების გზამ შანსი მოგვცა, პირველი რესპუბლიკის ბედი არ გავიზიაროთ, მარტო აღარ ვიყოთ გადარჩენისთვის ბრძოლაში.

ეს შანსი ააღლიტა ჩვენს ხალხს ივანიშვილმა. ახლა გიმტკიცებენ, რომ თურმე საერთაშორისო იზოლაციაში დარჩენილი, უმეგობრო და უმოკავშირეო საქართველო, ივანიშვილის ბრძნული საგარეო პოლიტიკის შედეგი და გადარჩენის ფორმულაა.

ჯოგად მიაჩნიათ ქართველი ხალხი, უვიც, არაფრის მცოდნე ჯოგად, რომლის ერთადერთი დანიშნულება, საკუთარი გაღარიბების ხარჯზე, ივანიშვილის რეჟიმის გამდიდრებაა", — დაწერა სალომე სამადაშვილმა.

ცნობისთვის, შალვა პაპუაშვილმა სოციალურ ქსელში დაწერა, რომ " ვენესუელაში ჩატარებულმა რამდენიმეწუთიანმა ოპერაციამ ისიც დაადასტურა, რომ ევროკავშირი, როგორც საერთაშორისო წესრიგის გარანტი და მსოფლიო გეოპოლიტიკური მოთამაშე აღარ არსებობს და, როგორც ჩანს, ის ასეთად ვეღარასდროს იქცევა."