ჩინეთის საგარეო საქმეთა სამინისტროს ოფიციალურმა წარმომადგენელმა, მაო ნინმა, აშშ-ის მიერ ვენესუელის დაკავებულ პრეზიდენტზე საუბრისას განაცხადა, რომ აშშ-მა პრეზიდენტ ნიკოლას მადუროს სახელმწიფოს მეთაურის სტატუსის უგულებელყოფით ბრალი ქვეყნის შიდა სასამართლოში ღიად წარუდგინა და ჩაატარა ე.წ. "სასამართლო პროცესი", რაც სერიოზულად არღვევს ვენესუელის სუვერენიტეტს და მნიშვნელოვნად აზიანებს საერთაშორისო ურთიერთობების სტაბილურობას. არც ერთ ქვეყანას არ უნდა ჰქონდეს უფლება, თავისი წესები საერთაშორისო სამართალზე მაღლა დააყენოს, — წერს Global Times.

მათივე ცნობით, მაო ნინმა ჩინური მხარის სახელით აშშ-ს მოუწოდა, რომ დაუყოვნებლივ გაათავისუფლონ მადურო და მისი ცოლი.

"ჩინური მხარე მოუწოდებს შეერთებულ შტატებს, დაუყოვნებლივ გაათავისუფლოს პრეზიდენტი მადურო და მისი მეუღლე და უზრუნველყოს მათი უსაფრთხოება", — თქვა მაო ნინმა.

ცნობისთვის, მადუროს ბრალად ედება კოკაინის ტრეფიკინგის ქსელის ხელმძღვანელობა, რომელიც ძალადობრივ ჯგუფებთან, მათ შორის მექსიკის სინალოას და ზეტას კარტელებთან, კოლუმბიის FARC-ის მეამბოხეებთან და ვენესუელის კრიმინალურ დაჯგუფება "ტრენ დე არაგუასთან" თანამშრომლობდა.

მას ოთხი სისხლის სამართლის ბრალდება აქვს წაყენებული: ნარკოტერორიზმი, კოკაინის იმპორტის მიზნით შეთქმულება, ასევე ავტომატური იარაღისა და დამანგრეველი მოწყობილობების ფლობა, თუმცა მადურო თავს უდანაშაულოდ მიიჩნევს.

მადურო წლებია უარყოფს ამ ბრალდებებს და აცხადებს, რომ ისინი ვენესუელის მდიდარი ნავთობის რესურსების ხელში ჩაგდებისკენ მიმართული იმპერიალისტური გეგმების საფარია.

შეგახსენებთ, აშშ-მა ვენესუელის პრეზიდენტი ნიკოლას მადურო და მისი მეუღლე 3 იანვარს დააკავა.