სახალხო დამცველის აპარატი ოცნების ხელისუფლების პარლამენტის მიერ შეკრება-მანიფესტაციის შესახებ კანონის გამკაცრებას ეხმაურება.

აპარატის განცხადებით, "შეკრება, მისი ძირითადი ბუნებიდან გამომდინარე, შესაძლოა, იწვევდეს ცხოვრების ჩვეული რიტმის გარკვეულ შეფერხებას, თუმცა მსგავსი შეფერხება ხელისუფლებამ უნდა დაუშვას, გარდა იმ შემთხვევისა, როდესაც ამით მომეტებულად ზიანდება შემხვედრი ინტერესი".

"სახალხო დამცველისთვის არ არის მკაფიოდ განჭვრეტადი რა შემთხვევაში შეიძლება ტროტუარზე პროტესტის გამოხატვამ უფლებაში ჩარევის ლეგიტიმური საფუძველი
შექმნას, მით უფრო, როდესაც უფლებით სარგებლობა, როგორც წესი, ამ ფორმით დროის მცირე მონაკვეთში ხორციელდება," — ვკითხულობთ განცხადებაში.

აპარატი მაგალითად მოიხმობს ადამიანის უფლებათა ევროპული სასამართლოს მიდგომაზე, რომლის მიხედვითაც წინასწარი გაფრთხილება არ უნდა გახდეს პროტესტის შემზღუდავი მექანიზმი. განცახდებაში ასევე ვკითხულობთ, რომ კანონპროექტში შეტანილი ცვლილება საქართველოს კონსტიტუციის 21-ე მუხლს ეწინააღმდეგება.

"გასათვალისწინებელია ისიც, რომ ფართოდ ფორმულირებული საკანონმდებლო დანაწესების აღსრულება არ უნდა მოხდეს იმგვარად, რომ წინასწარი გაფრთხილების ვალდებულებამ პრაქტიკაში შეკრების გამართვის შესაძლებლობა ნებართვის მიღებას დაუქვემდებაროს, რაც პირდაპირაა აკრძალული საქართველოს კონსტიტუციის 21-ე მუხლით," — ვკითხულობთ განცხადებაში.

შეგახსენებთ, კანონპროექტში ცვლილებებით შეზღუდვა დაწესდა ხალხის მოძრაობის ადგილას შეკრებაზე და დემონსტრანტებმა შსს 5 დღის ვადაში უნდა გააფრთხილონ. კანონპროექტში ასევე ვკითხულობთ, რომ გაუქმდა სახდელით სახით აღმკვეთი ღონისძიება და კანონის დარღვევის შემთხვევაში მოქალაქეს პატიმრობა ემუქრება.