სპეციალისტებმა უკვე დაიწყეს ეგვიპტის ავიახაზების იმ ეარბას a320-ის ე.წ. შავი ყუთების ანალიზი, რომელიც დაახლოებით 1 თვის წინ ხმელთაშუა ზღვაში ჩამოვარდა.

მოწყობილობები, რომელიც "შავი ყუთების" სახელითაა ცნობილი, იწერენ ჩამოვარდნის მომენტამდე თვითმფრინავის სალონში არსებულ ხმებსა და ასევე, ყველანაირ ტექნიკურ მონაცემს ავიალაინერის მუშაობის შესახებ. აღნიშნულ მოწყობილობებს სპეციალისტებმა 17 ივნისს, ზღვის ფსკერზე, 3 კილომეტრის სიღრმეში მიაკვლიეს, მათ მონაცემთა გასაშიფრად დიდი დრო დასჭირდებათ, რადგან დაზიანების ხარისხი მაღალია. სწორედ ამის შემდეგ გაირკვევა, რეალურად რა დაემართა სამგზავრო თვითმფრინავს.

სამგზავრო თვითმფრინავი, რომელიც 2016 წლის 19 მაისს პარიზი-კაიროს რეისს ასრულებდა, დაშვებამდე 20 წუთით ადრე, ხმელთაშუა ზღვის თავზე გაუჩინარდა. საბერძნეთის ხელისუფლების თქმით, მათმა სამხედრო რადარმა დააფიქსირა, თვითმფრინავის ჯერ მარცხნივ, შემდეგ კი 360 გრადუსით მარჯვნივ მობრუნება, 11 კილომეტრის სიმაღლიდან კი ვარდნა დაიწყო, დაახლოებით 4.5 კილომეტრის სიმაღლეზე კი რადარებიდან გაუჩინარდა.

თვითმფრინავის ბორტზე სულ 66 ადამიანი იმყოფებოდა.

ჯერჯერობით, უცნობია, რა გახდა თვითმფრინავის ჩამოვარდნის მიზეზი, არ გამოირიცხება ტერორისტული აქტიც, თუმცა, მომხდარზე პასუხისმგებლობა ამ დრომდე არცერთ ტერორისტულ ორგანიზაციას არ აუღია.

სპეციალისტები ვარაუდობენ, რომ საქმე, შესაძლოა, ეხებოდეს თვითმფრინავის გაუმართაობას, რადგან ჩამოვარდნამდე რამდენიმე წუთით ადრე, თვითმფრინავის ელექტრონულმა სისტემამ სატელიტზე გაგზავნა პილოტების კაბინაში ტემპერატურის მატებისა და კვამლის აღმოჩენის სიგნალი, თუმცა, მიზეზი რა იყო, ე.წ. შავი ყუთების სრულ გაშიფვრამდე უცნობი რჩება.