დიდი ბრიტანეთის პარლამენტის წევრი ჯეიმს მაკლირი ბათუმელებისა და ნეტგაზეთის დამფუძნებლის, მზია ამაღლობელის The Guardian-ში გამოქვეყნებულ სტატიას X-ზე გამოეხმაურა. მისი თქმით ამაღლობელის წერილი ყველასთვის "გამოფხიზლების ზარი უნდა იყოს". მისივე თქმით, საქართველო ახლა "ავტორიტარულო რეჟიმის" კლანჭებშია.

"მზია ამაღლობელის ძლიერი წერილი ციხიდან ყველასთვის გამოფხიზლების ზარი უნდა იყოს.

საქართველო იმყოფება ავტორიტარული რეჟიმის კლანჭებში, რომელსაც ზურგს უმაგრებს რუსეთში გამდიდრებული ოლიგარქი.

ბრიტანეთს ქართული დემოკრატიის მხარდაჭერაში მნიშვნელოვანი როლი აქვს", — დაწერა ჯეიმს მაკლირიმ.

დიდი ბრიტანეთის პარლამენტის წევრი ქართულ ოცნებასაც აკრიტიკებს და წერს, რომ

"ბოლო თვეებში ივანიშვილის მხარდაჭერილმა ქართულმა ოცნების ხელისუფლებამ მრავალი ოპოზიციური ხმა გამოგონილი ბრალდებებით დააპატიმრა.

ეს კლასიკური ავტორიტარიზმის მაგალითია.

დიდი ბრიტანეთი და ევროპა რუსეთთან უკვე კონფლიქტში არიან, ხოლო ქართული დემოკრატიის მხარდაჭერა ამ ბრძოლის ნაწილია", — დაწერა პარლამენტარმა.

სოციალურ ქსელში გამოქვეყნებულ კიდევ ერთ ტვიტში ჯეიმს მაკლირი ბიძინა ივანიშვილის დასანქცირებასთან დაკავშირებით წერს. მისი თქმით, ივანიშვილი და მასთან დაახლოებული პირები უნდა დასანქცირდნენ.

"დააწესეთ სანქციები ივანიშვილისა და მისი ახლო მოკავშირეების მიმართ, მოითხოვეთ პოლიტიკოსებისა და ჟურნალისტების გათავისუფლება და მხარი დაუჭირეთ საქართველოს ევროკავშირში გაწევრიანების ოცნების ასრულებაში.

დროა, დიდმა ბრიტანეთმა გადადგას ნაბიჯი", — წერია პარლამენტარის განცხადებაში.

ცნობისთვის, დაპატიმრებული ჟურნალისტის, მზია ამაღლობელის წერილი The Guardian-ში 27 სექტემბერს გამოქვეყნდა.