ჟურნალისტების კითხვაზე, თუ რას ფიქრობდა 4 ოქტომბერთან დაკავშირებით, ოცნების პრემიერმა, ირაკლი კობახიძემ განაცხადა, რომ "თუ ვინმე დაარღვევს კანონს, ყველა მიიღებს საკადრისს პასუხს".

"რაც შეეხება ვეტერან ძალოვნებს, თქვენ იცით 2012 წლამდე რა მძიმე მდგომარეობა იყო ძალოვან სტრუქტურებში და რამდენი ადამიანი ჩართეს კანონსაწინააღმდეგო ქმედებებში მაშინდელი სისხლიანი რეჟიმის წარმომადგენლებმა. ასეთ ფონზე არავის უკვირს რამდენიმე ადამიანის მხრიდან ასეთი განცხადებების გაკეთება.

რაც შეეხება 4 ოქტომბერს, კიდევ ერთხელ — თუ ვინმეს წაუცდება ხელი, თუ ვინმე დაარღვევს კანონს, ყველა მიიღებს საკადრისს პასუხს. შესაბამისად არავის ვურჩევ მიიღოს ასეთი გადაწყვეტილება," — განაცხადა ირაკლი კობახიძემ.

21 სექტემბერს, შსს-ს განსაკუთრებულ დავალებათა დეპარტამენტის ყოფილმა მაღალჩინოსანმა, ირაკლი შაიშმელაშვილმა და ემიგრაციაში მყოფმა ვეტერანებმა საქართველოს ძალოვანი სტრუქტურის თანამშრომლებს საგანგებო განცხადებით მიმართეს და მოუწოდეს, "წამოვიდნენ და წამოიღონ თავიანთი წილი ღირსება" და "ემსახურონ საქართველოს".