ნეპალში პრემიერმინისტრად ყოფილი უზენაესი სასამართლოს თავმჯდომარე სუშილა კარკი დაინიშნა. 9 სექტემბერს, მასობრივი პროტესტის ფონზე, ქვეყნის ყოფილი პრემიერი ქეი ფი შარმა ოლი გადადგა. ნეპალის პრეზიდენტმა კი ვადამდელი არჩევნები 5 მარტს ჩანიშნა.

BBC-ს ინფორმაციით, პროტესტის ლიდერებსა და პრეზიდენტს შორის შეთანხმება რამდენიმე დღიანი კონსულტაციების შემდეგ შედგა. პროცესში იურისტებიც იყვნენ ჩართული.

სუშილა კარკის რეპუტაციიდან გამომდინარე, მის კანდიდატურას Gen Z-ს სტუდენტური ლიდერები მხარს უჭერდნენ. პროტესტში მონაწილე პირების განცხადებით, ახალი პრემიერის სამართლებრივი ცოდნა და გამოცდილება ქვეყანას კანონისა და წესრიგის აღდგენაში დაეხმარება და ძალადობაზე პასუხისმგებელი პირების წინააღმდეგ სასამართლო დევნას დაიწყებს.

ნეპალში ერთკვირიან მასობრივ პროტესტს 51 ადამიანის სიცოცხლე შეეწირა. პროტესტის მონაწილეებმა პარლამენტს და სახელისუფლებო წარმომადგენლების სახლებს ცეცხლი წაუკიდეს, რის შემდეგაც პოლიტიკოსებს ქვეყნის დატოვება მოუწიათ. პროტესტი მას შემდეგ გამწვავდა, რაც ნეპალის მთავრობამ სოციალური ქსელების გამოყენება აკრძალა. პროტესტის მონაწილეები ქვეყანაში დასადგურებულ კორუფციას და მთავრობის გადაწყვეტილებებს აპროტესტებდნენ.