ნეპალის პრემიერმინისტრი შარმა ოლი გადაგა. მან ეს გადაწყვეტილება ანტიკორუფციული დემონსტრაციების ფონზე მიიღო. ინფორმაციას Reuters ავრცელებს.

ოლის მთავრობამ სოციალური მედიის აკრძალვა ორშაბათს, 8 სექტემბერს მოხსნა, მას შემდეგ, რაც პროტესტები გამწვავდა და დემონსტრანტებმა პარლამენტის შტურმი სცადეს. პოლიციამ ცრემლსადენი გაზი და რეზინის ტყვიები გამოიყენა. არეულობას 19 ადამიანი ემსხვერპლა და 100-ზე მეტი დაშავდა.

"ქვეყნის რთული ვითარების გათვალისწინებით, დღევანდელი დღიდან ვწყვეტ ჩემს უფლებამოსილებას, რათა პრობლემა კონსტიტუციის შესაბამისად, პოლიტიკური გზით მოგვარდეს," — დაწერა ოლიმ პრეზიდენტ რამჩანდრა პაუდელისთვის მიწერილ გადადგომის წერილში.

Reuters-ის ცნობით, 73 წლის ოლი პრემიერი მეოთხე ვადით გასულ წელს, ივლისში, გახდა და ის 2008 წლიდან ქვეყნის მე-14 პრემიერია.

ნეპალის სამოქალაქო ავიაციის სამსახურმა გამოაცხადა, რომ კატმანდუს აეროპორტი — ქვეყნის მთავარი საერთაშორისო კარიბჭე — დაუყოვნებლივ დაიხურა, რადგან პროტესტის მონაწილეების მიერ გაჩენილი ხანძრების კვამლი საფრთხეს უქმნიდა თვითმფრინავების უსაფრთხოებას.

ავსტრალიის, ფინეთის, საფრანგეთის, იაპონიის, სამხრეთ კორეის, ბრიტანეთის, ნორვეგიის, გერმანიისა და აშშ-ის საელჩოებმა ნეპალში ერთობლივი განცხადება გაავრცელეს, რომელშიც ყველა მხარეს მაქსიმალური თავშეკავებისკენ, ესკალაციის თავიდან აცილებისა და ფუნდამენტური უფლებების დაცვისკენ მოუწოდეს.

ცნობისთვის, ნეპალის მთავრობამ გასულ კვირას გადაწყვიტა, რომ რამდენიმე სოციალური მედიის პლატფორმაზე წვდომა შეეზღუდა, მათ შორის Facebook-ზეც, რამაც ახალგაზრდების უკმაყოფილება გამოიწვია. ოფიციალური პირების თქმით, ბლოკირება შეეხო იმ პლატფორმებს, რომლებიც ხელისუფლების მოთხოვნებს დამატებითი კონტროლის მექანიზმების შესახებ არ დაემორჩილნენ და მიზნად ისახავდა ყალბ ID ბარათებთან, დეზინფორმაციასთან და სიძულვილის ენასთან ბრძოლას.