რუსეთში სიღარიბის ოფიციალური მაჩვენებელი 7%-მდე შემცირდა, თუმცა The Moscow Times მკვლევრებზე დაფუძნებით წერს, რომ ეს მონაცემი მოსახლეობის კეთილდღეობის რეალურ გაუმჯობესებას სრულად არ ასახავს, ვინაიდან ექსპერტები მიუთითებენ, რომ 2021 წელს შეცვლილმა მეთოდოლოგიამ სიღარიბის ოფიციალური მაჩვენებელი მნიშვნელოვნად შეამცირა.

"როსსტატის" ოფიციალური მონაცემებით, მეორე კვარტალში რუსეთში სიღარიბის ზღვარს ქვემოთ მოსახლეობის 7% ცხოვრობდა, რაც წინა წელთან შედარებით 0,4 პროცენტული პუნქტით ნაკლებია. თუმცა ეს არ ნიშნავს, რომ ადამიანებმა სიღარიბეს თავი დააღწიეს. გასული წლის შედეგებით, სიღარიბის ზღვარზე დაბალი შემოსავალი 9,7 მილიონ ადამიანს ჰქონდა.

ცნობისთვის, 2021 წლიდან სიღარიბის ზღვრის გამოთვლის მეთოდიკა შეიცვალა: მისი განსაზღვრა სამომხმარებლო კალათის ღირებულებას აღარ უკავშირდება, ამის ნაცვლად იგი ინფლაციის შესაბამისად ინდექსირდება.

რუსეთის მეცნიერებათა აკადემიის ეკონომიკის ინსტიტუტის ექსპერტები აღნიშნავენ, რომ ახალმა მეთოდოლოგიამ სიღარიბის დონე ხელოვნურად შეამცირა. მათი გათვლებით, მეთოდოლოგიის შეცვლის გარეშე სიღარიბის მაჩვენებელი მნიშვნელოვნად მაღალი იქნებოდა — მაგალითად, 2022 და 2023 წლებში ის 11,8% და 11,1% იქნებოდა, ნაცვლად "როსსტატის" ახალი მეთოდიკით მიღებული 9,8% და 8,5%-ისა.

სწორედ ამიტომ, რუსეთის ბევრი მოქალაქე, რომელიც ფორმალურად ღარიბთა კატეგორიას არ მიეკუთვნება, თავს მაინც ღარიბად მიიჩნევს.