კომუნიკაციების კომისიამ პროსამთავრობო ტელეკომპანია "რუსთავი 2" მიუკერძოებლობის პრინციპების დარღვევისთვის წერილობით გააფრთხილა. კომისიის ინფორმაციით, 10-12 აგვისტოს ტელეკომპანიამ ახალი ამბები პირადი დამოკიდებულების/მოსაზრებების საფუძველზე გააშუქა.

"კომუნიკაციების კომისიამ "მედია ჰოლდინგი" ბრენდული სახელით "რუსთავი 2" "მაუწყებლობის შესახებ" საქართველოს კანონის დარღვევის გამო, წერილობით გააფრთხილა. კერძოდ, კომუნიკაციების კომისიის მონიტორინგის შედეგად, რომელიც მიმდინარე წლის 10 აგვისტოდან 12 აგვისტოს ჩათვლით პერიოდს მოიცავდა, გამოვლინდა, რომ აღნიშნულ არხზე 21:00 საათიან საინფორმაციო გამოშვებებში იკვეთებოდა მაუწყებლის მიერ ახალი ამბების პირადი დამოკიდებულების/მოსაზრებების საფუძველზე გაშუქება," — წერია კომისიის განცხადებაში.

კომისიის განმარტებით, რადგან ტელეკომპანიას ბოლო ერთი წლის განმავლობაში მსგავსი ხასიათის დარღვევისთვის სანქცირებული არ ყოფილა, კომუნიკაციების კომისიამ მაუწყებელი კანონის შესაბამისად, წერილობით გააფრთხილა.

"მედიაჩეკერის" ინფორმაციით, ტელეკომპანიას შემდეგი ფრაზების გამოყენებისთვის ედავებოდნენ — "კონცერტები რუსეთში აგვისტოს ომის შემდეგ და იძულებითი მეტამორფოზა უკრაინის ომზე", "დუმილის კომფორტი მათ მხოლოდ უკრაინის ომმა დაურღვია და ისიც მხოლოდ იმიტომ, რომ გლობალურმა ტრენდმა აიძულა მორალური ამნეზიიდან გამოსულიყვნენ", "ოპოზიციის პასიურობით გაბრაზებული ბელადი და პლიაჟზე წამოკოტრიალებული ოპოზიცია" და ა.შ.

ცნობისთვის, 6 აგვისტოს კომისიამ პროსამთავრობო ტელეკომპანია POSTV ტერმინების გამოყენების გამო, 2 500 ლარით დააჯარიმა. კომისიის განმარტებით, ტელეკომპანიამ ბოლო ერთი წლის განმავლობაში აღნიშნულ დარღვევაზე გაფრთხილება მიიღო, ხოლო ხელმეორედ დარღვევისთვის მათ წინააღმდეგ ფულადი სანქცია გამოიყენეს.