ირაკლი კობახიძის განცხადებით, კოსმოსის უსაფრთხოების სამიტზე 3 დეკლარაცია მიიღეს და საქართველო თავიდან ბოლომდე იქნება ჩართული შესაბამისი გადაწყვეტილებების მიღების პროცესში.

კობახიძის განმარტებით, "მნიშვნელოვანია, ევროპას ჰქონდეს თავისი ხედვა, თავისი დამოუკიდებელი პოლიტიკა კოსმოსის საკითხებთან დაკავშირებით".

"ჩვენი, როგორც პატარა ქვეყნის, რესურსები ამ მიმართულებით შეზღუდულია, თუმცა ჩვენ ვართ გადაწყვეტილებების მიღების ნაწილი. ვმონაწილეობთ შესაბამისი გადაწყვეტილებების მიღებაში სხვადასხვა საერთაშორისო პლატფორმაზე. აქედან გამომდინარე, ბუნებრივია, ჩვენი პოზიციაც მნიშვნელოვანია ევროპელი პარტნიორებისთვის. ჩვენ შევუერთდით 3 სხვადასხვა დეკლარაციას, რომლებიც უკავშირდება კოსმოსის უსაფრთხოების საკითხებს. მომავალშიც გავაგრძელებთ მჭიდრო პარტნიორობას ჩვენს ევროპელ კოლეგებთან ამ საკითხებთან დაკავშირებით. საქართველო თავიდან ბოლომდე იქნება ჩართული შესაბამისი გადაწყვეტილებების მიღების პროცესში", — განაცხადა ირაკლი კობახიძემ.

"რადიო თავისუფლების" ინფორმაციით, სამიტზე შემდეგი დეკლარაციები მიიღეს:

• კოსმოსური სივრცის უსაფრთხოებისა და მდგრადობის შესახებ დეკლარაცია ითვალისწინებს კოსმოსური მოძრაობის კოორდინაციის სამოქმედო გეგმის შემუშავებას და ოპერატორებს შორის ინფორმაციის გაცვლის საერთაშორისო მექანიზმის შექმნას. მაკრონის თქმით, ეს განსაკუთრებით მნიშვნელოვანია კოსმოსური ნარჩენებისა და სამომავლო თანამგზავრული თანავარსკვლავედების მართვისთვის.
• Copernicus-ის შესახებ დეკლარაციით, მონაწილეები ევროკავშირის დედამიწის დაკვირვების პროგრამას "გლობალურ საერთო სიკეთედ" აღიარებენ და იღებენ ვალდებულებას, უზრუნველყონ მისი უწყვეტობა, დაიცვან პროგრამისთვის საჭირო რადიოსიხშირეები და შეინარჩუნონ მასზე ღია წვდომა.
• კოსმოსური სამეცნიერო მონაცემების შესახებ დეკლარაცია კი მონაცემების ხელმისაწვდომობის, ღიაობისა და მთლიანობის პრინციპებს ეფუძნება.

9-10 სექტემბერს ირაკლი კობახიძე, ემანუელ მაკრონის მიწვევით, პარიზში კოსმოსის საკითხებზე დაგეგმილ საერთაშორისო სამიტს დაესწრო. სამიტზე კობახიძესთან ერთად მთავრობის დელეგაცია იმყოფებოდა — საგარეო საქმეთა მინისტრი მაკა ბოჭორიშვილი, თავდაცვის მინისტრი ირაკლი ჩიქოვანი და მთავრობის ადმინისტრაციის უფროსი ლევან ჟორჟოლიანი.

კოსმოსის პირველ საერთაშორისო სამიტში 90 ქვეყნისა და საერთაშორისო ორგანიზაციის წარმომადგენლები, მათ შორის სახელმწიფოთა ლიდერები და უმსხვილესი კომპანიების ხელმძღვანელები მონაწილეობდნენ.

მთავრობის ადმინისტრაციის ინფორმაციით, სამიტი საფრანგეთის პრეზიდენტმა გახსნა. ემანუელ მაკრონმა ევროპის კოსმოსური ინდუსტრიის შესაძლებლობებზე ისაუბრა და აღნიშნა, რომ ევროპამ უნდა უზრუნველყოს კოსმოსში საკუთარი სტრატეგიული დამოუკიდებლობა და სუვერენიტეტი, განსაკუთრებით თანამგზავრული კომუნიკაციების, თავდაცვისა და უსაფრთხოების მიმართულებებით.

"ემანუელ მაკრონმა ხაზი გაუსვა საერთაშორისო თანამშრომლობის გაძლიერებისა და შესაბამისი ინვესტიციების განხორციელების მნიშვნელობას ევროპული ავტონომიის გაძლიერებისთვის, ვინაიდან მისი შეფასებით, სატელიტური კომუნიკაცია, ნავიგაცია და შესაბამისი ინფრასტრუქტურა უკვე ევროპული სუვერენიტეტის ნაწილია.

სამიტის გახსნაზე სიტყვით გამოვიდა ევროკომისიის პრეზიდენტი. ურსულა ფონ დერ ლაიენის თქმით, კოსმოსი მხოლოდ მეცნიერებისა და კვლევის სფერო აღარ არის. ის უკვე ევროპის ეკონომიკური ძალის, უსაფრთხოებისა და სუვერენიტეტის განუყოფელი ნაწილია. ამიტომ აუცილებელია, ევროპას ჰქონდეს საკუთარი საიმედო წვდომა კოსმოსზე და საკუთარი შესაბამისი ინფრასტრუქტურა, მათ შორის უსაფრთხო სატელიტური კომუნიკაციები, ნავიგაცია და დედამიწის დაკვირვების შესაძლებლობები," — ვკითხულობთ ადმინისტრაციის განცხადებაში.

9-10 სექტემბერს ირაკლი კობახიძე, მაკრონის მიწვევით, კოსმოსის საკითხებზე საერთაშორისო სამიტს დაესწრება