უკრაინის საგარეო საქმეთა მინისტრმა, ანდრეი სიბიგამ რუსეთი იმ უკრაინელების დაკავების გამო, რომლებიც საქართველოს ხელისუფლებამ ზემო ლარსის სასაზღვრო გამშვებ პუნქტთან შეაჩერა, მკაცრად გააკრიტიკა.

არსებული ინფორმაციით, დაახლოებით 90 უკრაინელი, რომლებიც რუსეთიდან გააძევეს, საზღვართან უფანჯრო სარდაფშია მოთავსებული, რადგან ქართულმა მხარემ, დოკუმენტების არქონისა და ზოგიერთი მათგანის შესაძლო კრიმინალური წარსულის გამო, მათ ქვეყანაში შემოშვებაზე უარი განაცხადა.

"რუსეთი უკრაინელების საქართველოს გავლით დეპორტაციას, იარაღად იყენებს. ჩვენ ვთავაზობთ რუსეთს, რომ ისინი პირდაპირ უკრაინის საზღვართან გადაიყვანოს," — დაწერა სიბიგამ X-ის პლატფორმაზე.

მისი თქმით, "უკრაინელი კონსულები აქტიურად მუშაობენ, რათა მათ დოკუმენტები მიაწოდონ და მათი მოლდოვის გავლით უკრაინაში მოხვედრა უზრუნველყონ." სიბიგამ ასევე აღნიშნა: "ჩვენ აქტიურად ვთანამშრომლობთ როგორც ქართულ, ასევე მოლდოვურ მხარესთან, რათა ჩვენი მოქალაქეები უკრაინაში დაბრუნდნენ. თუმცა, გარანტია არ არსებობს, რომ რუსეთი არ გაზრდის დეპორტირებულების რაოდენობას."

აღნიშნულ საკითხზე პრეზიდენტმა ვოლოდიმირ ზელენსკიმაც ისაუბრა და აღნიშნა, რომ სიბიგასგან მიიღო ინფორმაცია იმ "უკრაინელებზე, რომლებიც რუსეთის ტერიტორიიდან ფაქტობრივად "გამოყარეს" დოკუმენტების გარეშე და არც უკრაინას და არც საქართველოს არ ჰქონდათ წინასწარი გაფრთხილება."

"კერძოდ, ესენი არიან უკრაინელები, რომლებიც რუსებმა გაათავისუფლეს რუსეთის მიერ კონტროლირებად ტერიტორიაზე არსებული ციხეებიდან და სასჯელაღსრულების კოლონიებიდან. უკრაინელი დიპლომატები აწყობენ ჩვენი სახელმწიფოს ამ მოქალაქეების ტრანზიტს უკრაინაში,— თქვა ზელენსკიმ.

გარდა ამისა, შაბათს დაკავებულმა უკრაინელთა ჯგუფმა საზღვართან საპროტესტო აქცია გამართა, როგორც Telegram-არხი Astra იუწყება. ისინი საბაჟო ზონაში შესვლის უფლებას ითხოვდნენ, რათა წყალი შეეძინათ. ისინი ასევე სამედიცინო დახმარებას და ავადმყოფების ცალკე საცხოვრებელ სივრცეში გადაყვანას ითხოვდნენ.

ერთ-ერთმა დაკავებულმა Astra-ს განუცხადა, რომ დაინახა, როგორ დააკავეს, ხელბორკილები დაადეს და სცემეს ერთ-ერთი დემონსტრანტი ქართველმა მესაზღვრეებმა. ეს ბრალდება დამოუკიდებლად ვერ დადასტურდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.