რამდენიმე კვირაა, რაც რუსეთიდან დეპორტირებული 80-მდე უკრაინის მოქალაქე საქართველო-რუსეთის საზღვარზე, ზემო ლარსის გამშვებ პუნქტში, ბუფერულ ზონაშია ჩარჩენილი და სამშობლოში დაბრუნებას ვერ ახერხებს. ტელეკომპანია "დოჟდი" ავრცელებს ვიდეოს, სადაც ნათქვამია, რომ ერთ-ერთმა მათგანმა პროტესტის ნიშნად ყელზე ჭრილობა მიიყენა. ახალგაზრდა კაცი ამბობს, რომ ამ სარდაფში ყოფნას ვეღარ უძლებენ.

გავრცელებულ ვიდეოში უკრაინის მოქალაქეები ქართველ სამართალდამცავებს მიმართავენ, რომ "პირობები შეუქმნან". ერთ-ერთი ამბობს, რომ ხელბორკილი ჰქონდა ხელზე და 5 საათი სცემდნენ.

კიდევ ერთი უკრაინელის თქმით გაუსაძლის პირობებში, "ღორებივით" ჰყავთ გამოკეტილი. ისინი ითხოვენ, რომ "გაუშვან" და "სამშობლოში დაბრუნების შესაძლებლობა მისცენ".

17 ივლისს BBC გამოაქვეყნა სტატია, სადაც წერდა, რომ რუსეთის მიერ დეპორტირებული თითქმის 60 უკრაინელი რუსეთ-საქართველოს საზღვარზეა ჩარჩენილი და იძულებულნი არიან სარდაფში იცხოვრონ, რადგან უკან დაბრუნების ნებართვა არ აქვთ.

ოცნების ხელისუფლების შსს-მ 20 ივლისს გაავრცელა განცხადება, სადაც ნათქვამია, რომ "დარიალზე" ჩარჩენილ უკრაინის მოქალაქეებს ქვეყანაში იმიტომ არ უშვებენ, რომ მათ უმრავლესობას "მძიმე კრიმინალური წარსული" აქვს.

მათვე ცნობით, უწყების ცნობით, დარიალზე 80-მდე უკრაინელი იმყოფება და მათ უმრავლესობას აქვს მძიმე კრიმინალური წარსული. განცხადებაში ასევე ნათქვამია, რომ "ქართულმა მხარემ უკრაინულ მხარეს შესთავაზა რამდენიმე მექანიზმი, თუ როგორ შეიძლება მოხდეს ე.წ. ნეიტრალურ ზონაში მყოფი ადამიანების უსაფრთხოდ გაყვანა და დაბრუნება მათ სამშობლოში. ჩვენ მიერ შეთავაზებული იყო როგორც საჰაერო, ასევე საზღვაო გზით, მოცემულ პირთა სამშობლოში დაბრუნების ვერსიები. საზღვაო გზით დაბრუნებაზე უკრაინული მხარე ჯერჯერობით თავს იკავებს და ამ დრომდე მათი გაყვანის შესახებ კონკრეტული გადაწყვეტილება არ მიუღიათ".