წულუკიანის საგამოძიებო კომისიამ 430-გვერდიანი დასკვნის პროექტი წარადგინა. კომისიის ბოლო სხდომაზე, მან წევრებსა და საზოგადოებას სიტყვითაც მიმართა და აღნიშნა, რომ დოკუმენტში ქრონოლოგიურადაა თავმოყრილი საქართველოს უახლესი ისტორიის შესატყვისი ფაქტები და ინფორმაცია.

"კომისიის დასკვნა, პირველ რიგში, მნიშვნელოვანია იმით, რომ დოკუმენტში თავმოყრილია ყველა ის ფაქტი და ქმედება, რომელსაც ჩადიოდა ნაციონალური მოძრაობა, მიხეილ სააკაშვილი და მასთან დაკავშირებული პირები 2003 წლის ნოემბრიდან დღევანდელი დღის ჩათვლით.

ეს არის დოკუმენტი, რომელსაც ნებისმიერი ადამიანი რომ გაეცნობა, განურჩევლად ასაკისა — და დიდი იმედი მაქვს, რომ მას ახალგაზრდები გაეცნობიან — ნახავს, თუ რა ხდებოდა ჩვენს ქვეყანაში, როგორი იყო ფაქტები და არა რომელიმე კომისიის წევრის მოსაზრება მხოლოდ. ერთ დოკუმენტში ქრონოლოგიურად არის ჩვენი უახლესი ისტორიის შესატყვისი ფაქტები და ინფორმაცია, რაც საკუთრივ ამ დოკუმენტის ღირებულებაა.

ასევე იმედი მაქვს, რომ მოცემული დოკუმენტი შესაბამისს საგამოძიებო ორგანოებს გამოადგება სხვადასხვა მიმართულებით დამატებითი ინფორმაციის მოსაძიებლად, ასევე შესაბამისს სასამართლოებს თუ არასამთავრობო ორგანიზაციებს, რომელიც მოწოდებული არიან იმისთვის, რომ ნამდვილი ანალიზი და ნამდვილი კვლევა აწარმოონ და საკუთარი სამშობლოს ინტერესებისათვის გამოიყენონ. ასეთ არასამთავრობო ორგანიზაციებს, რომელიც, სხვათა შორის, არსებობს და გაძლიერება სჭირდება, ეს მასალა გამოადგებათ", — თქვა თეა წულუკიანმა.

თეა წულუკიანის თქმით, დასკვნა, სავარაუდოდ, სექტემბრის დასაწყისში გასაჯაროვდება.

ცნობისთვის, წულუკიანის კომისიაზე გამოუცხადებლობის საქმეზე ციხეში არიან: კოალიცია ცვლილებისთვის 3 ლიდერი — ნიკა მელია, ნიკა გვარამია, ზურაბ ჯაფარიძე და ლელოს 2 ლიდერი — მამუკა ხაზარაძე და ბადრი ჯაფარიძე და სტრატეგია აღმაშენებლის ლიდერი, გიორგი ვაშაძე.