კოალიცია ცვლილებებისთვის ერთ-ერთი ლიდერი, ზურაბ გირჩი ჯაფარიძე დააკავეს. მას აღკვეთის ღონისძიების სახით შეფარდებული 20 000-ლარიანი გირაო პატიმრობით შეეცვალა. გადაწყვეტილება მოსამართლე ირაკლი შვანგირაძემ გამოაცხადა.

ზურაბ გირჩი ჯაფარიძეს ხელბორკილები სასამართლოს სხდომათა დარბაზში დაადეს.

მანამდე ზურაბ ჯაფარიძის ადვოკატებმა სასამართლო დარბაზი პროტესტის ნიშნად დატოვეს. მოსამართლემ ზურაბ გირჩი ჯაფარიძის შუამდგომლობა საზოგადოებრივი ადვოკატის დანიშვნასთან დაკავშირებით არ დააკმაყოფილა.მისი თქმით, ზურაბ ჯაფარიძის ადვოკატებმა სასამართლოს დარბაზი სასამართლოს პროცესის გაჭიანურების მიზნით

თბილისის საქალაქო სასამართლოში ზურაბ ჯაფარიძის სასამართლო პროცესი დღეს, 22 მაისს, 15:00 საათზე იყო ჩანიშნული. მანამდე, 14:00 საათზე მისმა მხარდამჭერებმა აქციაა დააანონსეს, მაგრამ სასამართლოს მიმდებარე ტერიტორიაზე საპოლიციო ძალების მობილიზება უფრო ადრე დაიწყო.

პროცესზე მედიის წარმომადგენლებს კამერების შეტანის საშუალება არ მისცეს.

სასამართლოს ეზოში არ შეუშვეს ზურა ჯაფარიძის მხარდასაჭერად მისული მოქალაქეების ნაწილი. აქტივისტებმა სასამართლოსთან გზა გადაკეტვაც სცადეს, მაგრამ სამართალდამცავებმა გზა მალევე გახსნა.

პერიოდულად აქტივისტებსა და პოლიციას შორის ადგილი ჰქონდა დაპირისპირებას.

ჩვენს ხელთ არსებული ინფორმაციით, დააკავეს აქტივისტები ალბი კორძაია და სალომე კენჭიაშვილი.

ზურაბ ჯაფარიძემ პროცესის დაწყებამდე განაცხადა, რომ მას აქვს მოლოდინი, რომ, ირაკლი ოქრუაშვილის მსგავსად, დაიჭერდნენ.

მისივე თქმით, "რეჟიმი ახალ ფაზაზე გადავიდა, როცა აქტივისტებს და დემონსტრანტებს კი არა, პოლიტიკურ ლიდერებს აკავებენ, ამას კი მოჰყვება რეაგირება ცივილიზებული სამყაროსგან".

"განწყობა ნორმალური მაქვს, ველოდებოდი ამას... ნებისმიერ შემთხვევაში ინდიკატორია, რომ რეჟიმი ახალ ფაზაზე გადავიდა, როცა აქტივისტებს და დემონსტრანტებს კი არა, პოლიტიკურ ლიდერებს აკავებენ, ჯამში, ამას მოყჰვება რეაგირება ცივილიზებული სამყაროსგან. სანქციების ალბათობა და მასშტაბები უფრო გაიზრდება... ამათაც ესმით მაგდენი, მაგრამ თვითონ შეიყვანეს საკუთარი თავი ჩიხში და ახლა სხვა გამოსავალი არ აქვს. მოქალაქეებმა უნდა გააგრძელო წინააღმდეგობა — პირველ რიგში, რუსთაველზე ყოველ ღამე და საჯარო დემონსტრირება, რომ ჩვენ ამ ქვეყანაში ხელები არ ჩამოგვიშვია", — განაცხადა კოალიცია ცვლილებისთვის ერთ-ერთმა ლიდერმა, ზურაბ გირჩი ჯაფარიძემ "მთავართან" საუბრისას.

გამოძიება სისხლის სამართლის კოდექსის 349-ე მუხლით მიმდინარეობს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. დანაშაული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

შეგახსენებთ, რომ თეა წულუკიანის კომისიაზე გამოუცხადებლობის გამო დაკისრებული ჯარიმის გადაუხდელობისთვის თავდაცვის ყოფილი მინისტრი, ირაკლი ოქრუაშვილი 14 მაისს სასამართლო დარბაზში დააკავეს.

ამავე საქმეზე ბრალი უკვე წაუყენეს და აღკვეთის ღონისძიებად გირაო შეუფარდეს შემდეგ პოლიტიკოსებს: ნიკა მელიას (50 000 ლარი) მამუკა ხაზარაძესა და ბადრი ჯაფარიძეს (50 000-50 000 ლარი), გივი თარგამაძეს (10 000 ლარი), ზურა ჯაფარიძეს (20 000 ლარი), გიორგი ვაშაძეს (50 000 ლარი), ნიკა გვარამიას (30 000 ლარი).