კოალიცია ცვლილებისთვის ერთ-ერთ ლიდერს, ნიკა გვარამიას ოცნების პარლამენტის დროებითი საგამოძიებო კომისიაზე გამოუცხადებლობისთვის 8-თვიანი პატიმრობა შეეფარდა და 2 წლის ვადით თანამდებობის დაკავება აეკრძალა.

საქმეზე განაჩენი მოსამართლე ჯვებე ნაჭყებიამ გამოიტანა. პროცესს არ ესწრებოდა თავად ნიკა გვარამია.

ოპოზიციის ლიდერს ბრალი სისხლის სამართლის კოდექსის 349-ე მუხლით აქვს წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ცნობისთვის, ნიკა გვარამიას აღკვეთის ღონისძიების სახით 30 000-ლარიანი გირაო ჰქონდა შეფარდებული, რაც მან კანონით დადგენილ ვადაში არ გადაიხადა. მას გირაო პატიმრობით შეუცვალეს.

შეგახსენებთ, წულუკიანის კომისიაზე გამოუცხადებლობისთვის ციხეში არიან ოპოზიციის სხვა ლიდერებიც. მოსამართლე ნინო გალუსტაშვილმა სტრატეგია აღმაშენებლის ლიდერს, გიორგი ვაშაძეს 7-თვიანი პატიმრობა შეუფარდა. ვაშაძეს აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა. კომისიაზე გამოუცხადებლობისთვის კოალიცია ცვლილებისთვის ლიდერს ნიკა მელიას 8 თვით, ამავე კოალიციის ლიდერს ზურაბ გირჩი ჯაფარიძეს 7-თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, ციხეშია კოალიცია ცვლილებისთვის ლიდერი ნიკა მელია, რომელიც ამ საქმეზე განაჩენის მოლოდინშია და თავდაცვის ყოფილი მინისტრი ირაკლი ოქრუაშვილი.

ასევე იხილეთ: