საზოგადოების პოლიტიკური ინტერესების შესახებ ინფორმაცია საშუალებას გვაძლევს, გავიგოთ, რამდენად ინფორმირებულნი და საზოგადოებრივი ცხოვრებით დაინტერესებულნი არიან მოქალაქეები. მკვლევრები დიდი ხნის განმავლობაში დაობდნენ, რომ პოლიტიკური ინტერესი — ხმის მიცემით დაწყებული, პროტესტით დამთავრებული — დემოკრატიული ჩართულობის მთავარი საფუძველია. სამხრეთ კავკასიაში, სადაც არ არსებობს კონსოლიდირებული დემოკრატიული ინსტიტუტები, იმის გაგება, ვინ არის პოლიტიკურად აქტიური და რა კუთხით, გვაძლევს დემოკრატიული ჩართულობის ხელშეწმყობი და ხელისშემშლელი ფაქტორების ანალიზის საშუალებას.

კავკასიის ბარომეტრის 2024 წლის მონაცემების თანახმად:

საერთაშორისო პოლიტიკით დაინტერესებულია:
სომხები — 45%; ქართველები — 30%

შიდა პოლიტიკით დაინტერესებულია:
სომხები — 63%; ქართველები — 54%

სომხეთის შემთხვევაში, რეგრესიული ანალიზი აჩვენებს, რომ საერთაშორისო პოლიტიკისადმი ინტერესს რამდენიმე ფაქტორი განაპირობებს:

• სქესი: ქალები კაცებზე ნაკლებ ინტერესს იჩენენ.
• ასაკი: უფროსი ასაკის მოქალაქეები (55 წლის და ზემოთ) ორჯერ უფრო მეტად არიან დაინტერესებულნი საერთაშორისო პოლიტიკით, ვიდრე ახალგაზრდები 18-დან 34 წლამდე.
• განათლება: მოქალაქეები, რომლებსაც არ აქვთ უმაღლესი განათლება, ნაკლებ ინტერესს ავლენენ საერთაშორისო პოლიტიკის მიმართ, ვიდრე ის მოქალაქეები, რომლებსაც უმაღლესი განათლება აქვთ მიღებული.

შიდა პოლიტიკით დაინტერესების კუთხით, სომხეთის რეგრესიული ანალიზი აჩვენებს, რომ:

• უფროსი თაობა გაცილებით უფრო დაინტერესებულია, ვიდრე ახალგაზრდობა — ამ სტატისტიკაში, 55 წლის და უფროსი ასაკის მოქალაქეები 27 ერთეულით სჭარბობენ 18-დან 34 წლამდე ახალგაზრდებს.
• უმაღლესი განათლების არმქონენი ნაკლებ ინტერესს იჩენენ.
• შემოსავალი დაკავშირებულია პოლიტიკით დაინტერესებასთან — მდიდარი ოჯახები მეტად არიან სომხეთის შიდა პოლიტიკით დაინტერესებულნი, ვიდრე ისინი, ვინც ნაკლებ ქონებას ფლობს.

შიდა და საგარეო პოლიტიკით დაინტერესება მნიშვნელოვნად არ უკავშირდება დასახლების ტიპს, ეთნიკურ კუთვნილებასა და დასაქმების სტატუსს.

საერთაშორისო პოლიტიკით დაინტერესების მოდელი გარკვეულწილად იგივეა საქართველოშიც:

• ქართველი ქალები ნაკლებად არიან დაინტერესებულნი საერთაშორისო პოლიტიკით.
• ასაკოვან მოქალაქეებს ახალგაზრდებთან შედარებით მეტი ინტერესი აქვთ — 55 წლის და უფროსი ასაკის მოქალაქეები ორჯერ უფრო მეტად არიან დაინტერესებულნი საერთაშორისო პოლიტიკით, ვიდრე 18-დან 34 წლამდე ახალგაზრდები.
• ის მოქალაქეები, რომლებიც თბილისის გარეთ ურბანულ ან სასოფლო დასახლებებში ცხოვრობენ, ნაკლებად დაინტერესებულნი არიან საერთაშორისო პოლიტიკით, ვიდრე დედაქალაქის მაცხოვრებლები.
• ეთნიკური უმცირესობები ეთნიკურ ქართველებთან შედარებით ნაკლებ ინტერესს ავლენენ.
• ქონება პირდაპირ უკავშირდება საერთაშორისო პოლიტიკით დაინტერესებას — ყველაზე მაღალი შემოსავლის მქონე მოქალაქეები უფრო მეტად არიან დაინტერესებულნი, ვიდრე ნაკლები შემოსავლის მქონენი.

რაც შეეხება საქართველოს შიდა პოლიტიკას, რეგრესიული ანალიზის შედეგები აჩვენებს, რომ

• სოფლებში მცხოვრები მოსახლეობა ნაკლებადაა დაინტერესებული შიდა პოლიტიკით, ვიდრე დედაქალაქში მცხოვრებლები.
• უფროსი ასაკის და შედარებით მაღალი შემოსავლის მქონე მოსახლეობა შიდა პოლიტიკის მიმართაც უფრო მეტ ინტერესს ავლენს.

საქართველოში განათლების დონე და დასაქმების სტატუსი არ არის დაკავშირებული არც შიდა და არც საერთაშორისო პოლიტიკით დაინტერესებასთან.

ორ ქვეყანას შორის არსებული განსხვავებების მიუხედავად, ტრენდები ერთმანეთს შეესაბამება — ორივე ქვეყანაში უფრო მეტი ადამიანია დაინტერესებული შიდა პოლიტიკით, ვიდრე საერთაშორისო პოლიტიკით. მონაცემები ასევე ცხადყოფს, რომ სომხები უფრო მეტად არიან დაინტერესებულნი პოლიტიკით, ვიდრე ქართველები.

სტატიაში წარმოდგენილი შედეგები აღებულია კავკასიის ბარომეტრის 2024 წლის მონაცემების რეგრესიული მოდელიდან, რომელიც შემდეგ ცვლადებს მოიცავს:

• სქესი — მდედრობითი ან მამრობითი.
• ასაკობრივი ჯგუფი — 18-34; 35-54; 55+.
• დასახლების ტიპი — დედაქალაქი, ურბანული დასახლება, სასოფლო დასახლება.
• ეთნიკური ჯგუფი — ეთნიკური უმრავლესობა და ეთნიკური უმცირესობა.
• განათლების დონე — უმაღლესი განათლება ან უფრო დაბალი საფეხური.
• დასაქმება — დასაქმებული, უმუშევარი.
• ქონება — ფლობს 13 სხვადასხვა უძრავ ქონებას, სიმდიდრის საერთო ინდექსი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.