"ეს იყო გარედან თავსმოხვეული, ვითომ დამოუკიდებელი ორგანო", — თქვა თბილისის მერმა, კახა კალაძემ ანტიკორუფციული ბიუროს გაუქმებაზე. რომელსაც 2026 წლის 2 მარტიდან აუდიტის სამსახური შეითავსებს.

"ეს იყო გარედან თავსმოხვეული, ვითომ დამოუკიდებელი ორგანო, თუმცა რეალურად, აღნიშნული მიმართულება შევა აუდიტის სამსახურში და გააგრძელებს ამ ფორმით მუშაობას.

ზოგადად, რეფორმების განხორციელება ძალიან მნიშვნელოვანია. საქართველო ამ მხრივ არის მოწინავე, გვაქვს წინ გადადგმული ნაბიჯები და ყველა შეფასებით, რომელიც დაფუძნებულია სამართლიანობაზე, ყველა საუბრობს იმაზე, რომ საქართველო დგამს ქმედით ნაბიჯებს, მიიწევს წინ და ეს ძალიან მნიშვნელოვანია. ჩვენ უნდა გავაგრძელოთ ამ მიმართულებით სვლა", — თქვა კახა კალაძემ.

შეგახსენებთ, რომ 11 ნოემბერს ტელეკომპანია "ფორმულამ" გაავრცელა ინფორმაცია იმის შესახებ, რომ ანტიკორუფციული ბიუროს ხელმძღვანელი, რაჟდენ კუპრაშვილი თანამდებობიდან გაათავისუფლეს. მათი ცნობით, აღნიშნული ინფორმაცია თანამშრომლებს თათბირზე თავად კუპრაშვილმა მიაწოდა.

მოგვიანებით ანტიკორუფციულმა ბიურომ უარყო "ფორმულას" მიერ გავრცელებულ ინფორმაციას რაჟდენ კუპრაშვილის გათავისუფლებასთან დაკავშირებით.