პარტია გახარია საქართველოს ერთ-ერთმა ლიდერმა, ლევან გოგიჩაიშვილმა ტელეკომპანია ფორმულას ეთერში გიორგი გახარიას პარლამენტის საგამოძიებო კომისიაზე 20 ივნისთან დაკავშირებულ გაკეთებულ განცხადებებზე საუბრისას თქვა, რომ "20 ივნისზე მოვისმინეთ ის, რაც სტრასბურგსაც უწერია, რომ იყო შტურმი, მოგერიება და გახარიამ არ გამორიცხა ის ფაქტი, რომ სადაც არის გამოყენებული ტყვიები, იქ შესაძლებელია ბიძინა ივანიშვილის ხელი ერიოს".

ლევან გოგიჩაიშვილმა დაამატა, რომ "იქიდან გამომდინარე, რომ მელიას დაკავებაშიც დაიწყო ბიძინა ივანიშვილმა ჩარევა, შესაძლებელია, რომ იქ თავისი დაცვის სამსახურის ხელმძღვანელის, ანზორ ჩუბუნიძის ხელით, არ გამოვრიცხავ, ასეთ ჩარევა ყოფილიყო ივანიშვილის მხრიდან" (სტილი დაცულია).

გოგიჩაიშვილმა თქვა, ეს არ იცოდა, მაგრამ ხვდებოდა, მაგრამ მნიშვნელოვანია, რომ ეს გახარიამ თქვა.

მისივე თქმით, 20 ივნისის შემდგომ ვეღარ ხდება "ნაციონალური მოძრაობის მხრიდან ოპორტუნიზმი ასეთ მშვიდობიან აქციებზე. ეს იყო ბოლო, როცა ნაციონალურმა მოძრაობამ დაინახა შესაძლებლობის ფანჯარა და დაიწყო მისი გამოყენება".

ჟურნალისტის კითხვაზე, უნდა გაერკვია თუ არა მაშინვე ეს გიორგი გახარიას? გოგიჩაიშვილმა უპასუხა: "როგორ უნდა გაერკვია, ჩუბუნიძეს ხომ არ აწამებდა?"

შეგახსენებთ, რომ 14 აპრილს 12:00 საათზე ენმ-ს ხელისუფლების საქმიანობის შემსწავლელი დროებითი საგამოძიებო კომისიის სხდომაზე პარტია გახარია საქართველოსთვის ლიდერი, გიორგი გახარია დაიბარეს.

13 აპრილის საღამოს, პარტიის პრესსამსახურმა გაავრცელა ინფორმაცია, რომ ზუსტად ამ დროს, 14 აპრილს, 12:00 საათზე გიორგი გახარია ბრიფინგს გამართავდა. დილით კი ამავე პრესსამსახურმა დაგვიდასტურა, რომ გიორგი გახარია კომისიაზე წარდგენას აპირებდა.

რატომ მივიდა გახარია საგამოძიებო კომისიაზე, ვინ გასცა 20 ივნისს რეზინის ტყვიების გამოყენების ნებართვა? — მთავარი 6-საათიანი სხდომიდან

რატომ მოვიდა გახარია საგამოძიებო კომისიის სხდომაზე? რას ედავება მას წულუკიანის კომისია? ვინ გასცა 20 ივნისს რეზინის ტყვიების გამოყენების ნებართვა? — ეს არის ის ძირითადი კითხვები რაზეც საგამოძიებო კომისიის სხდომაზე დღეს მსჯელობდნენ. სხდომა თითქმის 6 საათს გაგრძელდა.