ქართული ოცნების დეპუტატი ალექსანდრე ტაბატაძე, ჩორჩანას ეპიზოდთან დაკავშირებით, გენერალურ პროკურატურაში გამოკითხვაზე მივიდა. უწყებაში შესვლამდე მედიასთან გაკეთებულ კომენტარში ტაბატაძე აცხადებს, რომ ჩორჩანაში საგუშაგოს ჩადგმა "ესკალაციის საფრთხეს" შეიცავდა.

ცნობისთვის, ალექსანდრე ტაბატაძე ჩორჩანას ეპიზოდის დროს სახელმწიფო უსფრთხოების სამსახურის უფროსის მოადგილე იყო.

"რატომ არის [ეს საქმე] პოლიტიკურად მოტივირებული, როდესაც საქმე ეხება ქვეყნის ტერიტორიულ მთლიანობას? რა მნიშვნელობა აქვს 6 წლის შემდეგ იქნება თუ..? მაშინაც გვქონდა რეაქცია, რა თქმა უნდა, მაგრამ როდესაც სახელმწიფო უსაფრთხოებას ეხება საქმე, საჯაროდ ვერ ვიტყოდით და ვერც დღეს გეტყვით ვერაფერს.

რა თქმა უნდა, იყო ესკალაციის საფრთხე და მივიღეთ ის, რაც მივიღეთ. იცით, რომ მანამდე, ამ ხელისუფლების პირობებში 2 საგუშაგო დაიდგა, სადაც მოსახლეობას პრობლემები ექმნებოდა? ეს იყო 2012 წელს, როდესაც გორის რაიონის სოფელ ზარდიაანთკარში დაიდგა ერთი სტაციონარული საგუშაგო, მაგრამ ეს იყო ყველა უწყებასთან, საერთაშორისო ორგანიზაციებთან და პარტნიორებთან შეთანხმებული. ამის შემდეგ, იქიდან არანაირი საოკუპაციო ხაზი არ გადმოწეულა. საგუშაგო დაიდგა საჩხერის რაიონში, სოფელ პერევში. იმავე განხორციელდა იქაც. ჩვენ ასევე, მოვახდინეთ კოორდინაცია", - განაცხადა ალექსანდრე ტაბატაძემ. კომენტარს IPN ავრცელებს.

შეგახსენებთ, დღეს, 18:00 საათზე, გენერალურ პროკურატურაში გამოკითხვაზე დაბარებულია კახი კახიშვილიც, რომელიც ჩორჩანას ეპიზოდის დროს მთავრობის ადმინისტრაციის უფროსი იყო.

როგორც წულუკიანმა აღნიშნა, გახარიასთან კითხვები ექნებათ მისი გადადგომისა და ოპოზიციაში წასვლის პერიოდზეც, ასევე მისი და მისი პარტიის საქმიანობაზე საერთაშორისო ასპარეზზე.

შეგახსენებთ, პროკურატურის ცნობით, დაწყებული გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ცნობით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

ორი დღის წინ ამ საქმეზე სანქცირებული ყოფილი შს მინისტრი ვახტანგ გომელაური დაიკითხა.

ასევე იხილეთ: