პარტია გახარია საქართველოსთვის წევრი დიმიტრი ცქიტიშვილი გიორგი გახარიას დროებით საგამოძიებო კომისიის სხდომაზე მისვლას ეხმაურება. ის სოციალურ ქსელში წერს, რომ ოპოზიციურ პარტიებს შორის საგამოძიებო კომისიის სხდომაზე არმისვლის შესახებ შეთანხმება მართლაც შედგა მისი მონაწილეობითა და დასტურით, მაგრამ ამაზე წინასწარი მსჯელობა პარტიაში არ ყოფილა. თუმცა, იმასაც აღნიშნავს, რომ "რიგი ფაქტორები უნდა გაეთვალისწინებინა, როდესაც შეთანხმებას უერთდებოდი და წუხს, თუ ამით კოორდინაციის ფორმატი დააზიანა".

"მინდა ჩემი მხრიდან განვმარტო იმის შესახებ, თუ რა შეთანხმება შედგა კოორდინაციის ფორმატში.

კოორდინაციის ფარგლებში, საგამოძიებო კომისიის სხდომაზე არმისვლის შესახებ შეთანხმება მართლაც შედგა — ჩემი მონაწილეობითა და ჩემი დასტურით, მიუხედავად იმისა, რომ ამაზე წინასწარი მსჯელობა პარტიაში არ ყოფილა.

მაშინაც მიმაჩნდა და დღესაც იმავე აზრზე ვარ, რომ არ მისვლა იქნებოდა სწორი გადაწყვეტილება რიგი ფაქტორების გათვალისწინებით.

თუმცა, ამ საკითხს აქვს მნიშვნელოვანი პერსონალური განზომილება — განსაკუთრებით ისეთ საკითხებთან მიმართებით, როგორიცაა 20 ივნისი, ჩორჩანა, ან თუნდაც პრემიერ-მინისტრის პოსტის დატოვება. ეს თემები სცდება პარტიულ ჩარჩოებს და განეკუთვნება უფრო მაღალი, სახელმწიფოებრივი ინტერესების სფეროს.

ეს ფაქტორები მე უნდა გამეთვალისწინებინა, როდესაც შეთანხმებას ვუერთდებოდი, და ვწუხვარ თუ ამით კოორდინაციის ფორმატი დავაზიანე.

მიუხედავად იმისა, რომ გუშინდელმა დღემ არაერთგვაროვანი რეაქცია გამოიწვია — მათ შორის, პოზიტიური შეფასებებიც — მე კვლავ ვრჩები ჩემს პოზიციაზე, რომ კომისიაში სხდომაში მონაწილეობა არ იყო მიზანშეწონილი", – წერს ცქიტიშვილი.

შეგახსენებთ, რომ 14 აპრილს 12:00 საათზე ენმ-ს ხელისუფლების საქმიანობის შემსწავლელი დროებითი საგამოძიებო კომისიის სხდომაზე პარტია გახარია საქართველოსთვის ლიდერი, გიორგი გახარია დაიბარეს.

13 აპრილის საღამოს, პარტიის პრესსამსახურმა გაავრცელა ინფორმაცია, რომ ზუსტად ამ დროს, 14 აპრილს, 12:00 საათზე გიორგი გახარია ბრიფინგს გამართავდა. დილით კი ამავე პრესსამსახურმა დაგვიდასტურა, რომ გიორგი გახარია კომისიაზე წარდგენას აპირებდა.

რატომ მივიდა გახარია საგამოძიებო კომისიაზე, ვინ გასცა 20 ივნისს რეზინის ტყვიების გამოყენების ნებართვა? — მთავარი 6-საათიანი სხდომიდან

რატომ მოვიდა გახარია საგამოძიებო კომისიის სხდომაზე? რას ედავება მას წულუკიანის კომისია? ვინ გასცა 20 ივნისს რეზინის ტყვიების გამოყენების ნებართვა? — ეს არის ის ძირითადი კითხვები რაზეც საგამოძიებო კომისიის სხდომაზე დღეს მსჯელობდნენ. სხდომა თითქმის 6 საათს გაგრძელდა.