აზერბაიჯანული მედია, თურქეთის თავდაცვის სამინისტროზე დაყრდნობით, წერს, რომ საქართველოს საზღვრიდან 5 კმ-ში ჩამოვარდნილ თურქეთის კუთვნილ C130 სამხედრო-სატვირთო თვითმფრინავის ბორტზე 20 სამხედრო მოსამსახურე იმყოფებოდა.

"ჩვენი C130 სამხედრო სატვირთო თვითმფრინავი, რომელიც აზერბაიჯანიდან ჩვენს ქვეყანაში მიფრინავდა, საქართველო-აზერბაიჯანის საზღვარზე ჩამოვარდა", — ნათქვამია თურქეთის თავდაცვის სამინისტროს განცხადებაში.

მათი თქმით, სამძებრო-სამაშველო ოპერაციები საქართველოს ხელისუფლებასთან კოორდინაციით დაიწყო.

"ფაქტთან დაკავშირებით გამოძიება სისხლის სამართლის კოდექსის 275-ე მუხლის მე-4 ნაწილით, რაც საჰაერო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.

დეტალურ ინფორმაციას მომხდართან დაკავშირებით, შინაგან საქმეთა სამინისტრო საზოგადოებას ეტაპობრივად მიაწვდის," — ნათქვამია შსს-ს მიერ გავრცელებულ განცხადებაში.

აზერბაიჯანის პრეზიდენტმა, ილჰამ ალიევმა თურქეთის პრეზიდენტს, რეჯეფ თაიფ ერდოღანს მომხდართან დაკავშირებით სამძიმრის წერილი გაუგზავნა.

"შოკირებული ვართ სიახლით, რომ თურქეთის საჰაერო ძალების სამხედრო სატვირთო თვითმფრინავი, რომელიც განჯიდან მიფრინავდა, საქართველოს ტერიტორიაზე ჩამოვარდა. ვიზიარებ თქვენ მწუხარებას ამ რთულ დროს და აზერბაიჯანელი ხალხის სახელით, თანაგიგრძნობთ თქვენ, დაღუპულთა ოჯახებსა და ახლობლებს და თურქეთის მოძმე ხალხს" – ვკითხულობთ წერილში.