იაპონიის დასავლეთით კუნძულ კიუშუზე მდებარე ვულკანმა საკურაჯიმა რამდენჯერმე ამოიფრქვა. ამოფრქვევას თან მოჰყვა 4.4 კილომეტრი სიმაღლის კვამლი და ფერფლი, რის გამოც ათობით ავიარეისი გაუქმდა. ამის შესახებ ინფორმაციას Reuters ავრცელებს.

იაპონიის მეტეოროლოგიური სააგენტოს მიხედვით, ამოფრქვევა დაახლოებით ღამის 1-ელ საათზე დაიწყო. ამის შემდეგ კიდევ ორი ამოფრქვევა დაფიქსირდა — 02:30-ზე და 08:50-ზე.

Reuters ადგილობრივ მედიაზე დაყრდნობით წერს, რომ ეს არის პირველი შემთხვევა ბოლო 13 თვის განმავლობაში, როცა ამოფრქვევის სიმაღლემ 4 კილომეტრს გადააჭარბა.

საკურაჯიმა ერთ-ერთი ყველაზე აქტიური ვულკანია იაპონიაში და სხვადასხვა დონის ამოფრქვევები რეგულარულად ხდება.