"ვერ დავადასტურებ სატელეფონო ფორმატით იყო თუ არა პრემიერმინისტრისთვის ცნობილი, მაგრამ ოფიციალურ ფორმატში ინფორმაცია არ ყოფილა," — ამის შესახებ ოცნების მთავრობის ადმინისტრაციის ყოფილმა უფროსმა, კახა კახიშვილმა პროკურატურაში გამოკითხვის დეტალებზე საუბრისას განაცხადა.

"როგორც ცნობილია, საქართველოს პროკურატურაში დაბარებული ვიყავი დაკითხვაზე ჩორჩანას საგუშაგოს აღმართვასთან დაკავშირებით. იმ პერიოდში ვიყავი მთავრობის ადმინისტრაციის უფროსი. გამოძიებას აინტერესებდა იყო თუ არა მთავრობის ადმინისტრაცია ინფორმირებული ამ მოსალოდნელ საფრთხეებზე ან გადაწყვეტილების მიღებასთან. მე ვუპასუხე როგორც იყო — საქართველოს მთავრობის ადმინისტრაცია ამ საკითხთან დაკავშირებით ოფიციალურად არ ყოფილა [ინფორმირებული] მეტიც, არცერთ სამუშაო თათბირზე, რომელიც ჩემი მონაწილეობით მიმდინარეობდა, ეს საკითხი არ განხილულა",- განაცხადა კახიშვილმა. კომენტარს IPN ავრცელებს.

კახიშვილის განცხადებით, მაშინდელი პრემიერის მამუკა ბახტაძის ინფორმირებულობასთან დაკავშირებით, არცერთი უწყებიდან ადმინისტრაციაში კორესპონდენცია არ შესულა.

"ამ საკითხთან დაკავშირებით ოფიციალური კორესპონდენცია პრემიერმინისტრის ინფორმირებულობის მიზნით, ინფორმაცია საქართველოს ადმინისტრაციაში არცერთი უწყებიდან არ შემოსულა. ვერ დავადასტურებ სატელეფონო ფორმატით იყო თუ არა პრემიერ-მინისტრისთვის ცნობილი, მაგრამ ოფიციალურ ფორმატში ინფორმაცია არ ყოფილა.

თუ ნახავთ არქივებს, ეს საკითხი 29-ში [აგვისტო] გახმაურდა, ხოლო 2-ში [სექტემბერი], ფაქტობრივად 3 დღეში, მამუკა ბახტაძე გადადგა. ბახტაძემ გადადგომის შესახებ ოფიციალური განცხადება გააკეთა. თუმცა გადადგომამდე 1 კვირის წინ, უმაღლესმა თანამდებობის პირებმა ვიცოდით, რომ პრემიერი გადადგომას აპირებდა, შესაბამისად, პრემიერი აქტიურობით არ გამოირჩეოდა. მეტიც, რადგან ბახტაძე თვლიდა, რომ უნდა გადამდგარიყო, აგვისტოს მეორე ნახევარში მთავრობის სხდომებიც არ ჩატარებულა. 29-ში რომ გახდა ცნობილი და 2-ში თანამდებობას ტოვებს, რა რეაგირება უნდა მოეხდინა მას?!",- განაცხადა მან. [IPN]

რაც შეეხება თავად კახიშვილს, როგორც თავად ამბობს, "ამის შესახებ ინფორმაცია მედიის საშუალებით შეიტყო და სხვა ფორმატით ამასთან დაკავშირებით ინფორმაცია არ მიუღია".

შეგახსენებთ, პროკურატურის ცნობით, დაწყებული გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება". წყების ცნობით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

ცნობისთვის, სამი დღის წინ ამ საქმეზე სანქცირებული ყოფილი შს მინისტრი ვახტანგ გომელაური დაიკითხა, ხოლო გიორგი გახარია საქართველოს პარლამენტის დროებით საგამოძიებო კომისიაზე ჩორჩანას საკითხთან დაკავშირებით მეორედ დაიბარეს.

ასევე იხილეთ: