საზღვაო ტრანსპორტის სააგენტოს ყოფილი ხელმძღვანელის, ალექსი ახვლედიანი "ტვ პირველთან" სატელეფონო ინტერვიუში ამბობს, რომ აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე სამკურნალოდ წავიდა გერმანიაში და არა საცხოვრებლად. მისივე თქმით, პირველი ოპერაციის შემდეგ, რომელიც თურქეთში გაიკეთა, საქართველოში ჩამოსვლას და ჩვენების მიცემას აპირებდა, მაგრამ "სითხე მაინც ჩაუდგა თვალში და დამატებითი მკურნალობისთვის გადავიდა გერმანიაში"

"თვალის ერთი ოპერაცია ხომ გაიკეთა? მეორე ოპერაციასთან დაკავშირებით წავიდნენ გერმანიაში. საცხოვრებლად არავინ არ გადასულა. თვალის პრობლემა აქვს ისევ. მხედველობა არ დაუკარგავს, მაგრამ პრობლემები აქვს. პირველი ოპერაციის მერე კვლავ ჩაუდგა სითხე და ესაჭიროება დამატებით მკურნალობა. ...აპირებდა [დაბრუნებას]. პირველი ოპერაციის შემდეგ დარწმუნებული ვიყავით, რომ კარგად ჩაივლიდა და აღარ ჩაუდგებოდა სითხე და სამწუხაროდ მაინც ჩაუდგა და დამატებითი მკურნალობისთვის გადავიდა გერმანიაში. ...რა თქმა უნდა, [ჩვენების მიცემა] უნდა, რატომ არ უნდა ჩამოვიდეს?", — თქვა ახვლედიანმა "ტვ პირველთან" საუბრისას.

ალექსი ახვლედიანის თქმით, თორნიკე რიჟვაძესთან პირადად არ უსაუბრია, რადგან მას ტელეფონი კვლავ არ აქვს. მისი ჯანმრთელობის მდგომარეობის შესახებ ინფორმაცია კი ოჯახის წევრებისგან აქვს.

ცნობისათვის, გუშინ, 16 ნოემბერს "აჭარა თაიმსმა" გაავრცელა ინფორმაცია იმის შესახებ, რომ აჭარის მთავრობის ყოფილი თავმჯდომარე თორნიკე რიჟვაძე მშობლებთან, მეუღლესთან და შვილებთან ერთად გერმანიაში საცხოვრებლად გადავიდა. მათივე ცნობით, თორნიკე რიჟვაძეს ერთ თვალზე ხედვა დაკარგული აქვს.

მეტი თორნიკე რიჟვაძის საქმეზე: