სავალუტო ფონდის ინფორმაციით, კორუფციისა და მექრთამეობის შედეგად, მსოფლიო ეკონომიკა ყოველწლიურად 1,5-2 მილიარდ დოლარს კარგავს. ამის შესახებ მსოფლიო სავალუტო ფონდის ხელმძღვანელის კრისტინ ლაგარტის განცხადებაშია საუბარი. კორუფციის დონე მსოფლიოს მშპ-ს ორ პროცენტს უტოლდება. სავალუტო ფონდის ხელმძღვანელის განცხადებით, ეს მხოლოდ "აისბერგის მწვერვალია" და ამ მოვლენის შედეგები გაცილებით უფრო ღრმა და ყოვლისმომცველია.

"არც ერთი ჩვენგანი არ არის შოკირებული, ჩვენ ვიცით, რომ კორუფცია დიდ პრობლემას წარმოადგენს და ვეძებთ პრობლემის გადაჭრის გზებს", - ნათქვამია კრისტინ ლაგარტის განცხადებაში. ლაგარტის თქმით, კორუფციის დამარცხება მეტი გამჭვირვალობითა და ღიაობით იქნება შესაძლებელი.

ლაგარტის თქმით, ჯანდაცვისა თუ განათლებისთვის გამოყოფილი ფული ვერ აღწევს მოქალაქეებამდე და ხშირად, არაპატიოსანი მიზნებისთვის გამოიყენება. ვინაიდან, კორუფციის მსგავსი ტიპი სულ უფრო და უფრო ინსტიტუციონალიზებული ხდება, ეს არღვევს ნდობას მოქალაქეებსა და ხელისუფლებას შორის. რეალურად კორუფცია მოქალაქეებს უკეთესი ცხოვრების შანსს ართმევს.

კორუფციის დონე წლების განმავლობაში, დაახლოებით, ერთი და იმავე დონეზეა. წინა წლების მონაცემებით, კორუფციის შედეგად, მსოფლიოს ეკონომიკა ყოველწლიურად დაახლოებით 2 ტრილიონ დოლარს კარგავს.