ანტიკორუფციული ბიუროს ხელმძღვანელი რაჟდენ კუპრაშვილი NGO-ებს და სამოქალაქო საზოგადოების ორგანიზაციებს ხვდება, შეხვედრა დახურულია. შეხვედრა საქართველოს კანონს "უცხოეთის აგენტების რეგისტრაციის აქტს", ე.წ. ამერიკულ "ფარას" კანონს ეხება, რომელიც მიმდინარე წლის 31 მაისიდან შედის ძალაში.

"ჩვენ შეხვედრებს ვმართავთ ყველა იმ სავარაუდო სუბიექტებთან, მათ შორის არასამთავრობო ორგანიზაციებთან, რომელსაც შეიძლება შეეხოს ეს კანონი. დღევანდელ შეხვედრაზე განხილული იქნება კანონის აღსრულების მექანიზმები. "ფარას კანონი" არანაირად არ უნდა იყოს გაგებული რომ რაიმე სახის შეზღუდვებს აწესებს, ან რაიმე სახის სტიგმატიზაციას იწვევს, პირიქით, "ფარას კანონი" ეფუძნება იმ ძირითად პრინციპებს, რაც დაკავშირებულია გამჭვირვალობასთან, ნდობასთან", — განაცხადა კუპრაშვილმა "ტვ პირველი" ჟურნალისტთან საუბრისას.

გუშინ ანტიკორუფციული ბიუროს უფროსი ელჩებს, საქართველოში აკრედიტებულ დიპლომატიური კორპუსის და საერთაშორისო ორგანიზაციების წარმომადგენლებს შეხვდა.

კუპრაშვილმა ჟურნალისტის კითხვას, "აგენტი" განმარტებასთან დაკავშირებით თავი აარიდა.

"აგენტის განმარტება არის კანონში მითითებული. რატომ მეჩხუბებით, კარგი დილაა. ხვალ გვაქვს საინტერესო შეხვედრები არასამთავრობო ორგანიზაციებთან და ყველა დაინტერესებულ მხარესთან. ვინაიდან ძალიან დიდი ინტერესი იყო ამ ღონისძიებებთან დაკავშირებით, მოგვიწია რამდენიმე დღის დამატება სამუშაო შეხვედრების", — უპასუხა კუპრაშვილმა.

შეგახსენებთ, რომ უცხოური აგენტების რეგისტრაციის აქტი, "ფარას" კანონი 31 მაისს ამოქმედდება და მისი აღსრულება ანტიკორუფციულმა სამსახურმა უნდა განახორციელოს.

მეტი "ფარას" კანონის შესახებ.