ანტიკორუფციული ბიუროს ცნობით, ქართული ოცნების პარლამენტის მიღებული "უცხოური აგენტების რეგისტრაციის აქტი" (FARA) 2025 წლის 31 მაისს ამოქმედდება.

განცხადებაში ვკითხულობთ, რომ ბიუროს ორგანიზებით, მიმდინარე წლის 21 მაისს, ჩატარდება საინფორმაციო შეხვედრა. შეხვედრის მიზანია, კანონთან დაკავშირებულ საკითხებზე საზოგადოების ინფორმირება.

"გაცნობებთ, რომ საქართველოს კანონი "უცხოეთის აგენტების რეგისტრაციის აქტი" ამოქმედდება 2025 წლის 31 მაისს.

სსიპ ანტიკორუფციული ბიუროს ორგანიზებით, მიმდინარე წლის 21 მაისს, ჩატარდება საინფორმაციო შეხვედრა. შეხვედრის მიზანია, კანონთან დაკავშირებულ საკითხებზე საზოგადოების ინფორმირება.

შეხვედრაზე დასწრების მიზნით, დაინტერესებულმა პირებმა უნდა შეავსონ სარეგისტრაციო განაცხადი, 2025 წლის 8 მაისის ჩათვლით, შემდეგ ბმულზე.

ამასთან,დაინტერესებულ პირებს ეძლევათ შესაძლებლობა, მითითებული ბმულის მეშვეობით გამოგზავნონ შეკითხვები კანონთან დაკავშირებულ საკითხებზე. საინფორმაციო შეხვედრის შესახებ დეტალური ინფორმაცია რეგისტრირებულ მონაწილეებს ეცნობება 13 მაისს," — ვკითხულობთ განცხადებაში.

შეგახსენებთ, 1-ელ აპრილს ქართული ოცნების პარლამენტმა "უცხოური აგენტების რეგისტრაციის აქტი" (FARA) საბოლოოდ მიიღო.

"უცხოური აგენტების რეგისტრაციის აქტის შესახებ" კანონით გათვალისწინებული ვალდებულების შეუსრულებლობისთვის ან არაჯეროვნად შესრულებისთვის სისხლის სამართლებრივი პასუხისმგებლობა დაწესდება. ქართული ოცნების მიერ პარლამენტში ინიციირებულ კანონპროექტს სისხლის სამართლის კოდექსში ცვლილები ახლავს თან, რომლის მიხედვით, "უცხოური აგენტების რეგისტრაციის აქტის" დარღვევა დაისჯება ჯარიმით 5-დან 10 000 დოლარამდე ან 5 წლამდე თავისუფლების აღკვეთით.