კონსტიტუციონალისტი დავით ზედელაშვილი სოციალურ ქსელში წერს, რომ "ქართულ ოცნებას" "უცხოური აგენტების რეგისტრაციის აქტით" რუსეთის ანალოგი მარკირების ვალდებულება შემოაქვს და კანონის მეორე მოსმენით დამტკიცებული ვარიანტიდან ფოტოს აქვეყნებს.

"მარკირების ვალდებულება შემოაქვს რეჟიმს "აგენტების" გავრცელებულ ყველა ინფორმაციაზე. რუსული ანალოგი ალბათ გინახავთ. დღემდე მაგ მარკირებით აქვეყნებს ბევრი იქაური “აგენტი” რეჟიმისადმი კრიტიკულ ანალიტიკურ მასალებს", — წერს დავით ზედელაშვილი.

FARA-ს მიხედვით, უცხოური პრინციპალის აგენტმა რაიმე ინფორმაციული მასალის გავრცელებისას თვალსაჩინოდ უნდა მიუთითოს, რომ ეს მასალები გავრცელებულია აგენტის მიერ.

"უცხოური აგენტების რეგისტრაციის აქტში" ვკითხულობთ:

"უკანონოა საქართველოში მყოფი პირის მიერ, რომელიც წარმოადგენს უცხოური პრინციპალის აგენტს და ვალდებულია დარეგისტრირდეს ამ კანონის შესაბამისად, ან მესამე პირის მეშვეობით რაიმე ინფორმაციული მასალის საქართველოს საფოსტო გზავნილებით ან შიდა თუ საერთაშორისო კომერციის რომელიმე სხვა საშუალებით გავრცელება, ამ მასალებში თვალსაჩინო მითითების გარეშე, რომ ეს მასალები გავრცელებულია აგენტის მიერ უცხოელი პრინციპალის სახელით და დამატებითი ინფორმაცია დაცულია ანტიკორუფციულ ბიუროში. ანტიკორუფციული ბიუროს უფროსი უფლებამოსილია, განსაზღვროს ტერმინი "თვალსაჩინო" აღნიშნული კანონის მიზნებისთვის", — წერია "უცხოური აგენტების რეგისტრაციის აქტში".

ცნობისათვის, ოცნების პარლამენტმა ორი მოსმენით უკვე მიიღო "უცხოური აგენტების რეგისტრაციის აქტი". კანონპროექტის საბოლოო კენჭისყრა 31 მარტსაა დაგეგმილი.

ცნობისათვის, რუსეთში მსგავსი პრაქტიკა რამდენიმე წელია არსებობს.

2022 წლის შემოდგომაზე წიგნის მაღაზიებმა "უცხოეთის აგენტებად" გამოცხადებული მწერლების წიგნები ყავისფერ ქაღალდებსა და ცელოფნის შავ პარკებში შეფუთეს და დააწერეს: "უცხოეთის აგენტი". ბევრ მათგანს დაემატა წარწერა "18+". პუტინის რეჟიმის კრიტიკის გამო "უცხოეთის აგენტად" შერაცხილმა ბევრმა ხელოვანმა რუსეთი დატოვა. ზოგიერთი მათგანი ქვეყანაში ძებნილადაა გამოცხადებული.

2025 წლის 18 მარტს, ცნობილი გახდა, რომ მოსკოვის პროკურატურამ სისხლის სამართლის საქმე ქართული წარმოშობის რუსი მწერლის, ბორის აკუნინის (გრიგორი ჩხარტიშვილი) წინააღმდეგ "უცხოელ აგენტებზე" რუსეთში მოქმედი კანონის დარღვევის გამო აღძრა. ბორის აკუნინი ამჟამად რუსეთში აღარ ცხოვრობს. აგენტების გარდა, რუსეთში "ექსტრემისტთა და ტერორისტთა" რეესტრშიც ჰყავთ შეყვანილი. რუსეთში მისი წიგნების გაყიდვა და გამოცემა აკრძალულია.