Human Rights Watch და მისი ევროპისა და ცენტრალური აზიის დირექტორი ჰიუ უილიამსონი საქართველოში "უცხოური აგენტების რეგისტრაციის აქტის” [FARA] მიღების ინიციატივას ეხმაურება.

ჰიუ უილიამსონის თქმით, "უცხოური აგენტების კანონი შეიძლება იყოს საქართველოს დამოუკიდებელი სამოქალაქო საზოგადოების დასასრული".

ამას გარდა, Human Rights Watch-ის 26 მარტით დათარიღებულ განცხადებაში ნათქვამია, რომ საქართველოს პარლამენტმა უნდა უარყოს კანონპროექტი, რომელიც ითვალისწინებს სისხლისსამართლებრივი სასჯელის დაწესებას იმ სამოქალაქო აქტივისტებისა და არასამთავრობო ჯგუფებისთვის, რომლებიც უარს იტყვიან უცხოელ აგენტად დარეგისტრირებაზე.

განცხადებაში ნათქვამია, რომ კანონპროექტი არღვევს ადამიანის უფლებათა ფუნდამენტურ ნორმებს და მისი მიღების შემთხვევაში სერიოზულად დააზარალებს საქართველოს სამოქალაქო საზოგადოებას და კიდევ უფრო გაამწვავებს ადამიანის უფლებათა კრიზისს, რომელიც ხელისუფლებამ გამოიწვია ბოლო თვეებში.

"ეს კანონპროექტი, თუ მიღებული და აღსრულდება, დამოუკიდებელ აქტივისტებსა და ჯგუფებს არასწორი არჩევანის წინაშე დააყენებს, მიიღონ უცხოური აგენტის უსაფუძვლო და სტიგმატიზებული იარლიყი, ციხეში აღმოჩნდნენ ან ჯარიმის გადახდა დაეკისროთ ან საერთოდ უარი თქვან თავიანთ საქმიანობაზე", — თქვა ჰიუ უილიამსონმა, Human Rights Watch-ის ევროპისა და ცენტრალური აზიის დირექტორმა.

Human Rights Watch წერს, რომ კანონპროექტის საბოლოო კენჭისყრა დაგეგმილია 31 მარტის კვირას. თუ ის მიღებული იქნება, ის სავარაუდოდ ჩაანაცვლებს გასულ წელს მიღებულ კანონს „უცხოური გავლენის გამჭვირვალობის შესახებ“.