ანტიკორუფციული სამსახური დიპლომატებს და საერთაშორისო ორგანიზაციების წარმომადგენლებს ხვდება და "უცხოური აგენტების რეგისტრაციის აქტის", "ფარას" ე.წ. ამერიკული კანონის პრეზენტაციას აწყობს. ტელეკომპანია პირველის ინფორმაციით, უწყების ხელმძღვანელმა, რაჟდენ კუპრაშვილმა პირველი საინფორმაციო შეხვედრა დახურულ კარს მიღმა გამართა.

ტვ პირველის ჟურნალისტთან კუპრაშვილი ამბობს, რომ “ფარას კანონი უზრუნველყოფს გამჭვირვალობას და არანაირად არ არის დაკავშირებული რაიმე სახის სამუშაოების შეზღუდვასთან”.

"ფარას კანონი უზრუნველყოფს გამჭვირვალობას და არანაირად არ არის დაკავშირებული რაიმე სახის სამუშაოების შეზღუდვასთან. ფარას კანონი შეიძლება შეეხოს როგორც მედიას, ისე არასამთავრობო ორგანიზაციებს, ისე ფიზიკურ პირებს, ერთი არის, რომ უცხოეთიდან დაფინანსებას უნდა იღებდეს კონკრეტული ორგანიზაცია და ამავდროულად ის პოლიტიკური კონკრეტული საქმიანობა, რომელიც კანონს აქვს განსაზღვრული. არ არის საუბარი რაიმე სახის შეზღუდვების დაწესებაზე, პირიქით, ის უფრო მეტად გააჯანსაღებს იმ პროექტების წარმოჩენას, რაც დონორი ორგანიზაციების ხელით ხორციელდება ჩვენს ქვეყანაში", — აცხადებს კუპრაშვილი.

კუპრაშვილმა ჟურნალისტის კითხვას, "აგენტი" განმარტებასთან დაკავშირებით თავი აარიდა.

"აგენტის განმარტება არის კანონში მითითებული. რატომ მეჩხუბებით, კარგი დილაა. ხვალ გვაქვს საინტერესო შეხვედრები არასამთავრობო ორგანიზაციებთან და ყველა დაინტერესებულ მხარესთან. ვინაიდან ძალიან დიდი ინტერესი იყო ამ ღონისძიებებთან დაკავშირებით, მოგვიწია რამდენიმე დღის დამატება სამუშაო შეხვედრების", — უპასუხა კუპრაშვილმა.

შეგახსენებთ, რომ უცხოური აგენტების რეგისტრაციის აქტი, "ფარას" კანონი 31 მაისს ამოქმედდება და მისი აღსრულება ანტიკორუფციულმა სამსახურმა უნდა განახორციელოს.

მეტი "ფარას" კანონის შესახებ.