20 აპრილის ღამეს, რუსთაველის გამზირზე დაკავებულმა მიხეილ სამხარაძემ დაკავებიდან 48 საათში იზოლატორი დატოვა.

იზოლატორიდან გამოსული სამხარაძე ჰყვება, რომ მან პოლიციის ბრძანება შეასრულა და გზის სავალი ნაწილი დატოვა. მიუხედავად ტროტუარზე ყოფნისა, სამართალდამცავებმა ძალის გამოყენებით დააკავეს.

"მოწოდება რაც იყო, რომ დაგვეტოვებინა გზის სავალი ნაწილი, დავტოვეთ სავალი ნაწილი, ბასლაინის მიღმა ვიყავი გადასული, ბორდიურთან, როდესაც მოვიდნენ პოლიციელები და მაგას ვუხსნიდი ზუსტად, უბრალოდ ვუხსნიდი, რომ ბასლაინის მიღმა ვარ გადასული და რუსთაველის გამზირი დატოვებული მაქვს. შემდეგ სხვა პოლიციელი მოვარდა, ჯერ ხელი გვკრა რამდენჯერმე და შემდეგ გასცა დაკავების ბრძანება. [...] დაუმორჩილებლობა რაში გამოიხატებოდა ვერ ვხვდები, ბრძანება რაც იყო, იმას დავემორჩილეთ," — უთხრა სამხარაძემ ტვ პირველის ჟურნალისტს.

20 აპრილის ღამეს, მიხეილ სამხარაძესთან ერთად გიორგი ორთოიძეც დააკავეს. ორთოიძეს, მისი ცოლის, ნათია ბუკიას ინფორმაციით, 5-დღიანი პატიმრობა მიუსაჯეს.

"5 დღე მიუსაჯეს ჩემს უპატიოსნეს და უწესიერეს ქმარს ტროტუარზე დგომისთვის! ვიღაცა მერე მეტყვის, არა უშავს, მთავარია მეტი არ მიუსაჯესო.

არ იქნება სამართალი! არ იქნება მშვიდობა!" — დაწერა დაკავებულის მეუღლემ, ნათია ბუკიამ სოციალურ ქსელში.

შინაგან საქმეთა სამინისტროს ცნობით, აქციის მონაწილეებს ადმინისტრაციულ სამართალდარღვევათა კოდექსის 173-ე მუხლით გათვალისწინებული ქმედების ჩადენას ედავებიან, რაც პოლიციელისადმი დაუმორჩილებლობას გულისხმობს. მიხეილ სამხარაძის სასამართლო ჯერჯერობით არ გამართულა.