პარლამენტის ვიცესპიკერმა ნინო წილოსანმა სოციალურ ქსელში დაგროვებითი პენსიის ჯარიმებთან დაკავშირებით სახელმწიფოს მიერ დაგეგმილი ცვლილებები დააანონსა. მისი თქმით, პარლამენტი მიმდინარე კვირაში მიიღებს საკანონმდებლო პაკეტს, რომელიც ბიზნესსა და მოქალაქეებს მნიშვნელოვან შემსუბუქებებს შესთავაზებს, მათ შორის ათასობით კომპანიას დავალიანებები ჩამოეწერება, შემცირდება ჯარიმის ოდენობა და დასაქმებულთა ინტერესების დაცვის დამატებითი მექანიზმები ამოქმედდება.

როგორც ნინო წილოსანი წერს, დაახლოებით 13 500 დამსაქმებელს ჯამურად 43 მილიონ ლარამდე ჯარიმა ჩამოეწერება, თუ ისინი 2026 წლის ბოლომდე სრულად დაფარავენ საპენსიო დავალიანებასა და დარიცხულ თანხას. ამას გარდა, მცირდება ჯარიმის ოდენობაც.

"ალბათ, ბევრს გაინტერესებთ დაგროვებითი პენსიის ჯარიმებთან დაკავშირებით სახელმწიფოს მხრიდან დაგეგმილი ცვლილებები.

მიმდინარე კვირაში მივიღებთ საკანონმდებლო პაკეტს, რომელიც შემდეგ ცვლილებებს გულისხმობს:

დაახლოებით 13 500 დამსაქმებელს ჯამურად 43 მილიონ ლარამდე ჯარიმა ჩამოეწერება, თუ ისინი 2026 წლის ბოლომდე სრულად დაფარავენ საპენსიო დავალიანებასა და დარიცხულ თანხას.

ჯარიმა მცირდება — დღეს მოქმედი 500 ლარის, ხოლო განმეორებით შემთხვევაში 1 000 ლარის ნაცვლად, ჯარიმა 300 ლარი იქნება.

თუ დამსაქმებელი ან მოქალაქე საპენსიო ფონდის გადაწყვეტილებას არ ეთანხმება, საკითხის განხილვას ჯერ თავად ფონდში შექმნილი სპეციალური სამსახური შეძლებს, სასამართლოში წასვლის გარეშე.

შესაძლებელი გახდება საპენსიო შენატანისა და დარიცხული სარგებლის ეტაპობრივი გადახდა 18 თვემდე ვადით.

დაზუსტდება ჯარიმის ჩაბარებისა და გასაჩივრების წესი. შენატანის 10 დღეში დაფარვის შემთხვევაში ჯარიმა გაუქმდება, ხოლო გასაჩივრებისას აღსრულება შეჩერდება.

თუ საპენსიო შენატანი დაგვიანებით ჩაირიცხა, დასაქმებულს დაკარგული სარგებელი აუნაზღაურდება და თანხა მის საპენსიო ანგარიშზე დაემატება.

მთავარი მიზანია, დასაქმებულმა კუთვნილი საპენსიო თანხა სრულად მიიღოს, ხოლო დამსაქმებელს მიეცეს შესაძლებლობა, მოქნილი მექანიზმებით საკუთარი ვალდებულება ჯეროვნად შეასრულოს", — დაწერა წილოსანმა.