პოლიციამ დააკავა როდრიგო დუტერტე, ფილიპინების ყოფილი პრეზიდენტი, რომლის შესახებაც მოთხრობილია მარია რესას წიგნში — "როგორ დავამარცხოთ დიქტატორი".

ყოფილ პრეზიდენტს მისი მმართველობისას (2016-2022 წლებში), ძალოვნების მიერ "ნარკოტიკებთან ბრძოლის" კამპანიის ფარგლებში, ათასობით ადამიანის მოკვლას ედავებიან. აქტივისტების ცნობით, კლავდნენ ადამიანებს მხოლოდ ეჭვის ნიადაგზე, სასამართლო გადაწყვეტილებისა და ჩხრეკის ორდერის გარეშე.

დუტერტეს ასევე პოლიტიკური ოპონენტების დევნასა და დამოუკიდებელი მედიასთან ბრძოლაში ადანაშაულებენ. დამოუკიდებელი მედიასაშუალების, რაპლერის დამფუძნებელი მარია რესა ფილიპინებში სწორედ დუტერტეს მმართველობისას დააკავეს და არაერთი ბრალი წარუდგინეს.

წიგნმა საქართველოში პოპულარულობა მას შემდეგ მოიპოვა, რაც ბათუმელებისა და ნეტგაზეთის დამფუძნებელი მზია ამაღლობელი სასამართლოზე ამ წიგნით წარსდგა.

წყარო: პუბლიკა

როდრიგო დუტერტეს დაპატიმრება ჰააგის სისხლის სამართლის საერთაშორისო სასამართლომ მოითხოვა. ცნობისთვის, ფილიპინებს ამ სასამართლოს წევრობა 2019 წლიდან დატოვებული აქვს, თუმცა სასამართლო აცხადებს, რომ დანაშაული იმ დროსაა ჩადენილი, როდესაც ქვეყანა მისი წევრი იყო და შესაბამისად მისი იურისდიქცია ამ ნაწილში ვალიდურია.